काठमाडौंकी उपमेयर भन्छिन्  ः एक वर्ष त अन्यौलमा नै बित्यो

काठमाडौं  :  काठमाडौं उपमहानगरपालिकाका उपमेयर हरिप्रभा खड्गी श्रेष्ठले  एक वर्षको कार्यकाल अन्यौलपूर्ण अवस्थामा नै बितेको बताएकी छन् ।   निर्वाचित भई कार्यारम्भ सम्हालेको वर्षदिन पुग्न लागि सक्दा पनि राजधानी शहरको योजनावद्ध विकासका लागि प्रारम्भिक प्रयास समेत हुन नसकेको उनको आरोप छ  ।

उपमेयर खड्गीले प्रेसविज्ञप्ति जारी गर्दै योजनावद्ध विकासका खाकासमेत नआउँदा  अन्यौलपूर्ण अवस्था सिर्जना भएको बताइन । उनले कार्यपालिकाभित्र व्यापक छलफल र सहमतिमा निर्णय गर्ने परिपाटी विकास गरी अवलम्बन र अभ्यास गर्ने परिस्थिति निर्माण गर्न नसकिएको बताएकी छन् ।

 नागरिकको गुनासो सुन्ने तथा गुनासो व्यवस्थापन गर्ने प्रभावकारी प्रणाली विकास नगर्दा जनताका समस्याले समयमै निकास पाउने वातावरण बन्न नसकेको उनको आरोप छ ।  उपमेयर खड्गीले अनुगमन र मुल्याङ्कनको सन्तुलित प्रणाली विकास गरी महानगरपालिका कार्यालयको काम कारवाहीमा जवाफदेहिता र जिम्मेवारी बढाउने पद्दति विकास गरी लागु गर्न नसकिएको बताइन । 

उपमेयर खड्गीले मेयर विद्यासुन्दुर शाक्यप्रति इंगित गर्दै सामुहिक जिम्मेवारीका साथ काम गर्ने वातावरण बनाउने कुरामा नेतृत्वले उदासिनता देखाउँदै आएको आरोप लगाइन । उनले रानीपोखरी पुनःनिर्माण सम्बन्धमा उपयुक्त दृष्टिकोण अवलम्बन गर्न महानगरपालिका कार्यालयलाई अभिप्रेरित गरी पुननिर्माण कार्यमा भएको अनिश्चितता हटाउन प्रभावकारी भूमिका निर्वाह गरेको दाबी गरेकी छन् ।

 उपमेयर खड्गीले धरहराको उचित संरक्षण र विकासका लागि आवश्यक कार्य गर्न नेतृत्वदायी भूमिका निर्वाह गरेको बताइन । उनले नेपाली सेनाले महाङ्काल लगायतका स्थानमा भवन निर्माण गर्नु पूर्व भवन निर्माण इजाजत लिनुपर्नेमा त्यस्तो गरिएको नपाइएबाट सम्बन्धित अधिकारीहरुसँगको समन्वयमा समस्या समाधानको प्रयास गरिएको बताइन ।