काठमाडौं : सिंहदरबारको सर्भिस सेन्टरमा रहेको केन्द्रीय क्यान्टिनले कर्मचारीलाई खुलेयाम ठगी गरिरहेको पाइएको छ ।सरकारी निकायसँग सम्झौता गरी सिंहदरबारका कर्मचारी र विभिन्न काम लिएर आउने सेवाग्राहीलाई सस्तो र राम्रो खाजा खुवाउने जिम्मेवारी पाएको कञ्चन चमेनागृहद्वारा सञ्चालित केन्द्रीय क्यान्टिनले तोकिएको मूल्यभन्दा धेरै रकम लिएर कर्मचारीलाई ठगी गर्दासमेत सम्बन्धित निकाय मौन बसिरहेको छ ।
कञ्चन चमेनागृहले सिंहदरबार पुनर्निर्माण समितिसँग सम्झौता गरी क्यान्टिन चलाइरहेको भए पनि सो क्यान्टिनले गुणस्तरीय र राम्रो सेवा दिन नसकेको गुनासो कर्मचारी र अन्य सेवाग्राहीले गरेका छन् ।
पुनर्निर्माण समितिले पनि क्यान्टिनमा नियमित अनुगमन गर्न सकेको छैन ।
पुरानो क्यान्टिनको म्याद समाप्त भएपछि भदौमा सिंहदरबार पुनर्निर्माण समितिले क्यान्टिन सञ्चालन गर्न विभिन्न १० वटा आइटमसहित टेन्डर आह्वान गरेको थियो । भेज मम, चिकेन मम, रोटी तरकारी, चिकेन चाउमिन, भेज चाउमिन, चिउरा तरकारी, खाजा सेटलगायत १० आइटमका खाजा बिक्री गर्न टेन्डर हालेका ७ वटा कम्पनीमध्ये सबैभन्दा कम दररेटमा टेन्डर पेस गरेको कञ्चन चमेनागृहले स्वीकृति पाएको थियो । तर, कञ्चनले सरकारसँग सहमति गरेभन्दा बढी दररेटमा खाजाका आइटम बिक्री गरिरहेको पाइएको हो ।
सबैभन्दा बढी चल्ने भेज मम र चिकेन मममै कञ्चनले प्रतिप्लेट ३ रुपैयाँभन्दा बढी दरमा सेवाग्राहीसँग रकम असुलिरहेको छ । कर्मचारीका अनुसार टेन्डरमा भेज मम भ्याटसहित प्रतिप्लेट १७ रुपैयाँमा बिक्री गर्ने सम्झौता गरिए पनि क्यान्टिमा प्रतिप्लेट ३ रुपैयाँ बढाएर बिक्री गर्ने गरिएको छ । यसैगरी चिकेन मम भ्याटसहित प्रतिप्लेट ५७ रुपैयाँमा बिक्री गर्ने सम्झौता गरिए पनि प्रतिप्लेट ३ रुपैयाँ बढि लिएर ६० रुपैयाँमा बिक्री गर्ने गरिएको छ ।
कर्मचारीका अनुसार भेज मम र चिकेन मममा प्रयोग गर्ने मसला (किमा) पनि गुणस्तरहीन र स्वादहीन हुने गरेको छ । क्यान्टिनले चिकेन मममा राख्ने किमा प्रतिकेजी ३ सयमा ल्याउने गरेको छ तर बजारमा राम्रो र गुणस्तरीय किमालाई ५ सय ५० सम्म पर्ने गरेको छ । राम्रो किमा नल्याएर गुणस्तरहीन किमा ल्याउने र स्वादरहित मम बिक्री गर्ने गरेको गुनासो कर्मचारीको छ ।
कञ्चन चमेनाले सरकारसँग सम्झौता गरेका ममका आइटम थोरै बनाउने गरेको र अन्य सम्झौता नगरिएका आइटम महँगोमा बिक्री गर्ने गरेको छ । ‘कहिलेकाहीँ चिकेन मम र भेज मम चाँडै सकियो भनेर अन्य महँगा आएटम खान बाध्य पारिन्छ’, क्यान्टिनमा भेटिएका उद्योग, वाणिज्य तथा आपूर्ति मन्त्रालयका कार्यालय सहयोगी रामजी शर्माले भने । यसैगरी, सिंहदरबारमा काम लिएर आएका सेवाग्राही राकेश महतले भित्तामा टाँसिएको रेटभन्दा चिकेन मममा प्रतिप्लेट ३ रुपैयाँ बढी लिइएको बताए ।
केन्द्रीय चमेनागृहका सञ्चालक उत्तम भट्टले चमेनागृहबाट सस्तो र गुणस्तरीय खाजा प्रदान गर्न आफूहरू प्रयासरत रहेको दाबी गरे । उनले कहिलेकाहीँ खुद्रा पैसा नभएकाले प्रतिप्लेट ३ रुपैयाँ फिर्ता गर्न नसकिएको स्विकार्दै अब त्यस्तो स्थिति आउन नदिने बताए । सिंहदरबार पुनर्निर्माण समितिकी सूचना अधिकारी आरती पौडेलले अब आफूहरूले क्यान्टिमा नियमित अनुगमन गर्ने बताइन् । पौडेलले आफूहरूले नियमित अनुगमन गर्न नसकेको स्विकार्दै क्यान्टिनले सम्झौताभन्दा बढी रकम लिएको पाइए कारबाही गरिने जानकारी दिइन् ।
प्रतिक्रिया दिनुहोस !
