इरानका विश्वकपमा प्रभाव पार्न सक्ने खेलाडी 'अलिरेजा जहाबक्स'
जेठ २१, २०७५ सोमबार ८:१६:०
आक्रामक मिडफिल्डर अलिरेजा जहाबक्स इरानले पाएको उत्कृष्ट फुटबलरमध्येका एक हुन् । नेदरल्यान्ड्सको एजेड अल्कमारबाट व्यावसायिक फुटबल खेल्ने जहाबक्सले पछिल्लो समय क्लब फुटबल र राष्ट्रिय टोलीबाट पनि सशक्त प्रदर्शन गर्दै आएका छन् । अल्कमारका लागि यो सिजन २१ गोल गरेका जहाबक्स कुनै पनि ठूला युरोपेली लिग फुटबलमा एकै सिजन सर्वाधिक गोल गर्ने पहिलो एसियाली खेलाडी पनि हुन् ।
उनकै उपस्थितिले यस पटक इरान विश्वकपमा पनि बलियो देखिएको छ । सन् २०१३ यता इरानी राष्ट्रिय टोलीबाट नियमित रूपमा खेल्दै आएका जहाबक्सले राष्ट्रिय टोलीबाट ३७ खेल खेल्दै चार गोल गरेका छन् । जहाबक्सले यो सिजन अल्कमारका लागि गरेको प्रदर्शन राष्ट्रिय टोलीबाट पनि दोहोर्याउन सकेमा इरानले रुस विश्वकपमा समूहगत चरण पार गर्न सक्ने पर्याप्त सम्भावना छ ।
आक्रामक मिडफिल्डर तथा स्ट्राइकर दुवै भूमिकामा उस्तै लयमा खेल्न सक्ने २४ वर्षीय जहाबक्स टोलीका लागि आवश्यक परेको कुनै पनि समयमा गोल गर्न सक्षम खेलाडी हुन् । राष्ट्रिय टोलीबाट खेल्दा अन्य खेलाडीलाई अवसर सिर्जना गर्न पनि उनी उत्तिकै माहिर छन् । जहाबक्सको अर्को विशेषता भनेको उनी दुवै खुट्टाले उत्तिकै निपुणतापूर्वक खेल्न सक्छन् । यस्तो क्षमता प्राय: खेलाडीसँग हुँदैन ।
मैदानमा प्राविधिक रूपमा निकै सशक्त देखिने जहाबक्स रुस विश्वकप फुटबलमा हेर्न लायकका खेलाडीमध्येका एक हुन् । आगामी जुन १५ तारिखमा इरानले मोरक्कोविरुद्ध खेल्दै रुस विश्वकपमा आफ्नो यात्रा सुरु गर्दा टोलीलाई जिताउन जहाबक्सले गर्ने मेहनत र उनको खेल पक्कै पनि हेर्न लायकको हुनेछ ।
प्रतिक्रिया दिनुहोस !
