काठमाडौं : विकास क्षेत्रमा कलम चलाउने पत्रकारहरुको क्षमता अभिवृद्धि गर्न विकास पत्रकार मञ्च (फोडेज) नेपालले इन्टरनेशनल कल्चरल अफेयर्स (आईसिए) को सहकार्यमा एक दिने कार्यशाला सञ्चालन गरेको छ । राजधानीमा सोमबार भएको एक दिने कार्यशालामा समय व्यवस्थापनदेखि विषयवस्तुको प्रस्तुतिसम्मका विषय समेटिएका थिए ।
आईसिएका अध्यक्ष प्राध्यापक डा. तत्वप्रसाद तिमिल्सिनाले सञ्चारकर्मीलाई समय व्यवस्थापन चुनौति भएको भन्दै आफ्नो क्षेत्रमा अघि बढ्न, योजना पूरा गर्न र कामलाई निरन्तरता दिन समयको अहं भूमिका हुने बताए । एडवार्ड डेमिङले भनेजस्तै व्यक्तिगत रुपान्तरणविना केही कुरा सम्भव हुँदैन भन्दै उनले भने, ‘व्यक्ति होस् वा संस्था, सफल हुनका लागि भिजन र एक्सनसहितको स्ट्राटेजिक प्लान नबनाएसम्म कठिन छ ।’
प्रशिक्षक हरेराम भट्टराईले विकास पत्रकारिताका समाचार विगतको तुलनामा धेरै आउन थालेको तर अझै गहिराईमा नआएको बताए । उनले थपे, ‘समाचारमा तथ्य, अनुसन्धान र उदाहरणले पुष्टि दिन सके गरिमा बढ्नेछ, पाठकका लागि त्यो पत्रकार ब्राण्ड बन्न सक्छ ।’
महिलाको विकास र स्वस्थ्य प्रतिस्पर्धा नभएसम्म विकास सम्भव नहुने उनको भनाई छ । फोडेजका अध्यक्ष गोपीकृष्ण ढुंगानाले विकास पत्रकारिताको उद्देश्य प्राप्तिका लागि विगतको अनुभवसँग क्षमता अभिवृद्धिका लागि गरिएका सबै प्रयासलाई घुलमिल गरेर अघि बढ्नुपर्नेमा जोड दिए ।
उनले भने, ‘विकासका कतिपय विषयमा सामूहिक प्रयास आवश्यक हुन्छ भने कतिपय विषयमा सहकार्य ।’ कार्यशालामा टेलिभिजन, अखबार, अनलाइन र एफएमका सञ्चारकर्मी सहभागी थिए ।
प्रतिक्रिया दिनुहोस !
