मकवानपुर : प्रधानमन्त्री केपी शर्मा ओलीले नेपालका अब एक जना पनि भोकै मर्ने स्थिति हुन नदिने बताएका छन् । प्रदेश ३ को प्रदेश सभालाई सम्बोधन गर्दै प्रधानमन्त्री ओलीले भने, ‘सबैलाई खाने, बस्ने र लगाउने व्यवस्था गर्छौ, अब एक जना पनि जनता भोकै मर्ने छैनन् ।’
उनले पाँच वर्षभित्र लोकतन्त्रको नमुना राष्ट्र नेपाललाई बनाउने प्रतिबद्धता व्यक्त गरे । प्रधानमन्त्री ओली लोकतन्त्र कसैले उपहार दिएर आएको नभई जनताको वलिदानबाट आएको बताए। उनले अब मुलुक विकास र समृद्धिलाई कसैले रोक्न नसक्ने बताए । उनले भने, ‘विकास र समृद्धिले गति लिइसक्यो, अब यसलाई कसैले राक्न सक्दैन ।’
उनले प्रदेश राजधानी र नामको विषयमा झगडा नगर्न समेत निर्देशन दिए । ‘प्रदेशको नाम र राजधानीको लागि झगडा नगर्नु होस, राजधानी हुँदैमा विकास र समृद्धि हुने होइन, सबै ठाउँको विकासलाई उतिकै प्राथमिकता दिइन्छ,’प्रधानमन्त्री ओलीले भने । उनले भष्ट्राचार गर्न पनि नदिने र गर्नेलाई आफुले नसहने बताए । उनले सम्पूर्ण प्रदेश सभाका सदस्य र मन्त्रीहरुलाई जनताको पक्षमा काम गर्न समेत निर्देशन दिए ।
प्रधानमन्त्री ओलीले आफ्नो भारत भ्रमणमा राष्ट्रहित विपरीत कुनै सम्झौता गरेको बताए । ओलीले सरकारले अन्तर्राष्ट्रिय सम्बन्धलाई नयाँ उचाइमा उठाएको बताए । सरकारले राष्ट्रियतालाई असाधारण महत्व दिएको भन्दै आन्तरिक मामिलामा कसैले हस्तक्षेप सहन नसक्ने दावी समेत गरे ।
प्रतिक्रिया दिनुहोस !
