घोराही: प्रहरीले पाँच किलो अफिमसहित तीन जनालाई पक्राउ गरेको छ । प्रदेश प्रहरी कार्यालय अन्तर्गतको अनुसन्धान समुह र जिल्ला प्रहरी कार्यालय दाङको प्रहरी टोलीले घोराहीबाट पाँच किलो २०० ग्राम अफिमसहित पक्राउ गरेका तीनैजनालाई सोमवार पत्रकार सममेलन गरेर सार्वजनिक गरेको छ ।
प्रहरीले रोल्पा पाछावाङ घर भई हाल दाङको घोराही-१२ मा बस्ने शक्तिराम वली, रुकुम भुमे गाउँपालिका-८ का एलनकुमार रोका मगर र भुमे गाउँपालिका-६ का देबबहादुर ओलीलाई पक्राउ गरिएको जिल्ला प्रहरी कार्यालय दाङका निमित्त प्रहरी प्रमुख रामप्रसाद घर्ती मगरले जानकारी दिए । प्रहरीले उनीहरुलाई आइतवार राति घोराहीको मुख्य सडकबाट पक्राउ गरेको जनाएको छ ।
प्रहरीले शंकास्पद अवस्थामा खानतलासी गर्दा शक्तिराम वलीले बोकेको कालो रंगको झोलाभित्र अफिम फेला परेको थियो । पक्राउ परेका तीनै जनासँग आबश्यक अनुसन्धान भइरहेको निमित्त प्रहरी प्रमुख घर्ती मगरले जानकारी दिए ।
यसैबीच जिल्ला प्रहरी कार्यालय दाङका अनुसार आर्थिक वर्ष २०७४/०७५ मा मात्रै ३५ जनालाई लागूऔषधको कारोबारमा संलग्न भएको आरोपमा पक्राउ गरिएको छ । प्रहरीले चालू आर्थिक बर्षमा ४० किलो ९२४ ग्राम ९३० मिलीग्राम लागूऔषध बरामद गरेको छ ।
प्रतिक्रिया दिनुहोस !
