ललितपुर : प्रधानमन्त्री केपी ओलीले वातावरण विग्रनुमा ठूला मुलुक जिम्मेवार रहेको दाबी गरेका छन् । वातावरण संरक्षणका लागि दीर्घकालिन असरका बारेमा सोच्नु पनि उनले सचेत गराएका छन् ।
विश्व वातावरण दिवसका अवसरमा वन तथा वातावरण मन्त्रालय तथा राष्ट्रिय प्रकृति संरक्षण कोषद्वारा मंगलबार ललितपुरमा आयोजित कार्यक्रममा प्रधानमन्त्री ओलीले भने, ‘विश्वकै वातावरण बिग्रिनुमा ठूला मुलुक धेरै जिम्मेवार छन् । दुईवटा दाउरा बालेर कसौंडीमा भात पकाउँदैमा वा दुईवटा ढुंगा जोडेर मकै भुट्दैमा वातावरण प्रदुषण हुँदैन ।’
उनले भने, ‘पृथ्वी तथा मानवजातिको अस्तित्व बचाउन अहिलेको सरकार सचेत छ । हाम्रा सन्ततिको भविष्य सुरक्षित हुनुपर्छ ।’
कार्यक्रममा वन तथा वातावरणमन्त्री शक्तिबहादुर बस्नेतले वातावरणका क्षेत्रमा आगामी वर्षसम्ममा महशुस गर्न सकिने र गौरव गर्न लायकका परिवर्तन गर्न चाहेको बताए ।
भौतिक पूर्वाधार तथा यातायातमन्त्री रघुवीर महासेठले पाँच वर्षभित्रै ५० प्रतिशत विद्युतीय सवारी चलाउने निती ल्याइने बताए ।
ललितपुर महानगरपालिकाका प्रमुख चिरिबाबु महर्जनले मंगलबारै वातावरणवीद्सँग अन्तक्रिया गरेको प्रसंग सुनाउँदै प्रदुषित वातावरणका कारण दैनिक नौजनाले ज्यान गुमाएको तथ्यबारे जानकारी मिलेको सुनाए । ‘यो तथ्यले मेरो शरीरका रौं ठाडा भए’, महर्जनले भने ।
उनले काठमाडौं-ललितपुर दुई महानगरपालिकाले विद्युतीय बस सञ्चालन गर्न लागेको बताए ।
काठमाडौं महानगरपालिकाका प्रमुख विद्यासुन्दर शाक्यले काठमाडौं र ललितपुरको सहकार्यमा विद्युतीय बस ल्याउने तयारी भइरहेको जानकारी दिए । बस खरिदका लागि काठमाडौं महानगरले पाँच करोड र ललितपुरले एक करोड रुपैयाँ लगानी गर्ने शाक्यले जानकारी दिए ।
हिलोमा बालबालिका
व्यवस्थापन कमजोरीले कार्यक्रममा उपस्थित सयौं विद्यार्थी हिलोमा बस्न बाध्य भए । हिलोका कारण विभिन्न ठाउँबाट विद्यालय पोशाकमा आएका बालबालिकालाई कार्यक्रमस्थल रहेको जाउलाखेल फुटबल मैदानमा हिंड्न सकस परेको थियो । कार्यक्रमस्थलमा पाल टाँगिए पनि कार्यक्रममा आएका बालबालिकालाई भने बस्ने ठाउँ थिएन । प्रमुख अतिथिको रुपमा उपस्थित प्रधानमन्त्री केपी शर्मा ओलीले ठाउँको उचित व्यवस्थापन नगरेको भन्दै ललितपुर महानगरपालिकाका प्रमुख चिरिबाबुसँग गुनासो समेत पोखे ।
‘बालबालिकालाई यसरी हिलोमा राख्न हुँदैनथ्यो । अबदेखि व्यवस्थापनमा ध्यान दिनु हुनेछ’, प्रधानमन्त्री ओलीले सुझाब दिँदै भने ।
प्रतिक्रिया दिनुहोस !
