धनकुटा: धनकुटा नगरपालिका–९ को बेलहरा क्षेत्र तरकारी उत्पादनको पकेट क्षेत्र मानिन्छ । यस क्षेत्रमा करिब ९ सय घरपरिवारको बसोबास छ । यहाँका करिब ९९ प्रतिशत घरपरिवार व्यवसायिक तरकारी खेतीबाट जीविकोपार्जन गर्छन् । गोलभेँडा र अदुवा खेति यहाँको मुख्य आम्दानीका स्रोत हुन् ।
यहाँ उत्पादित तरकारी बजार क्षेत्रसम्म लैजान कृषि सडक निर्माण गरिएको सडक बर्खाको बेला हिलाम्ये र हिउँदमा धुलाम्मे हुने गरेपछि ग्राभेल गरिएको छ । अहिले गुठिटारदेखि सुकेआहालसम्म ग्राभेल सडक निर्माण भएपछि यहाँका बासिन्दालाई कृषिजन्य बस्तु बजारसम्म ल्याउन सहज हुने भएको छ ।
उन्नति समावेशी कार्यक्रमले स्थानीय उपभोक्तासँगको साझेदारीमा अहिले गुठिटार–बारखोर–छेडी–सुकेआहाल सडकखण्ड अन्र्तगत १२.५ किलोमिटर सडक ग्राभेल तीव्रगतिमा भइरहेको छ । अहिलेसम्म ७५ प्रतिशत निर्माण भइसकेको वडाध्यक्ष मनोज रायमाझीले बताए ।
ग्राभेल सडक निर्माणको सबै काम सम्पन्न भइसकेपछि बेलहरा क्षेत्रमा बाह्रैमास यातायात सञ्चालन भएर बजारसम्म तरकारी लैजान सहज हुने स्थानीय तिलकबहादुर महत बताउँछन् । १२.५ किलोमिटर सडक ग्राभेल निर्माण गर्न ७ वटा उपभोक्ता समिति बनाइएको छ ।
सबै स्थानीयबासिन्दा आफैँ खटिरहेका छन् । ‘वडाको बजेटले यति ठूलो लगानीमा सडक नबनाउन सक्ने अवस्था छैन । नगरपालिकाले पनि सबैतिर बजेट विनियोजन गर्दा हाम्रो वडामा मात्रै बजेट हाल्न सक्दैन’, वडाध्यक्ष रायमाझीले भने, ‘यो वडा कृषिजन्य वस्तु उत्पादनमा अगाडी रहेको कारण यहाँ ग्राभेल सडकको आवश्यकता थियो । उन्नति परियोजनाले बेलहरावासीलाई विश्वास गरेर लगानी गरेको छ ।’
उनका अनुसार निर्माणाधीन सडकको चौडाई ६ मिटर रहेको छ । होम पाइप, मेसिनरीवाल, ड्रेन, कच्ची नाली र ६ मिटर चौडाहा ग्राभेल गरिनेछ । दुईवडा ठूला सवारी साधन सजिलै वारपार गर्न सक्ने छन् । सडक निर्माणपछि सहिदभूमी गाउँपालिका छिन्ताङका माथिल्लो भेग, आँखिसल्ला र खोकुबासीलाई धरान र धनकुटा सदरमुकाम बजार जान छोटो दुरी भएको छ । त्यस्तै पाख्रिवास नगरपालिकाको मुगा, चुङवाङ र भोजपुरको दक्षिणी घोडेटार क्षेत्रबासीलाई धरान जान छोटो दुरी हुनेछ ।
प्रतिक्रिया दिनुहोस !
