धनकुटा: संखुवासभास्थित शसस्त्र प्रहरी बल अरुण गुल्मको बा१झ १६६९ नम्बरको ट्रकमा सखुवाको अवैध काठ लैजाँदै गर्दा धनकुटाको मुलघाटस्थित सशस्त्र प्रहरी चेक पोष्टले नियन्त्रणमा लिएको छ ।
सोमबार राति ट्रक जाच्ने क्रममा सशस्त्र प्रहरी बल मुलघाट चौकीले गैह्रकानुनीरुपमा लाँदै गरेको सखुवाको करिब एक सय क्यूफिटसहितको सशस्त्र प्रहरीकै ट्रक नियन्त्रणमा लिएको थियो ।
चेकजाँचका क्रममा गाडीभित्र सखुवाको काठ भेटिएपछि नियन्त्रणमा लिइएको सशस्त्र प्रहरी मुलघाटका इञ्चार्ज प्रहरी निरीक्षक दुर्गा भट्टले बताए । बरामद गरिएको काठको मूल्य करिब सात लाख रुपैयाँ रहेको छ ।
सशस्त्र प्रहरी बल अरुण गुल्म चैनपुरका लागि भौतिक संरचना निर्माणका लागि लिएको ५० किबी काठ आहाले सिस्ने सल्लेरी सामुदायिक वनबाट लिएको सामुदायिक वनकी सचिव सीता गौतम शर्माले जानकारी दिइन् ।
२०७४ फागुनमा गुल्मका डिएसपी रामप्रसाद भण्डारीलाई सखुवाको एउटा रुख काट्ने अनुमति उपभोक्ता समितिले दिएको छ । दुईवटा रुख काटिएपछि विवाद भएको थियो । डिएसपी भण्डारीले माफी मागेपछि गुल्मलाई दुईवटै रुखको काठ काट्न अनुमति दिएका थिए । गुल्मले काठ चिरानी नगरी टुना नै लैजान खोजे पनि उपभोक्ताले रोकेपछि काठ चिरानी गरेर लगेको थियो ।
गुल्मबाट सोमबार बेलुका सामुदायिक वनबाट कटान गरी लगेको काठको जानकारी पत्र लिन गएको थिए । डिएसपी भण्डारीले जानकारी पत्रको ओसी नराखी पत्र बनाई आग्रह गरेका थिए । तर सामुदायिक वनकी सचिव सीता गौतम शार्मले ओसी नराखी पत्र बनाउन नमिल्ने भन्दै ओसीसहितको जानकारी पत्र बनाएको पठाएको बताइन् ।
छानविन गर्न समिति गठन
गैह्रकानुनी सखुवाको काठसहित सशस्त्र प्रहरीको गाडी नियनत्रणमा लिइएको घटनाप्रति छनाबिन गर्न सशस्त्र प्रहरी बल पूर्वबाहिनी पकलीका प्रहरी उपरीक्षक (एसपी) गुणखर खनालको संयोजकत्वमा समिति बनाइएको छ । त्यस समितिले वुधवारबाटै काम सुरु गरेको छ । समितिका संयोजक खनाल सहितको टोली संखुवासभाको अरुण गुल्मतर्फ पुगिसकेको छ । २/३ दिनभित्र अध्ययन अनुसन्धान गरेर क्षेत्रीय प्रमुखलाई छानबिन प्रतिवेदन बुझाउने एसपी खनालले बताए ।
काठ गैह्रकानुनी भट्टले नियन्त्रण लिएको बाहिनीमा जानकारी दिएपछि पकलीस्थित सशस्त्रको बाहिनीबाट डिएसपी डम्बर विष्टको नेतृत्वको पहिलो छानबिन टोली बनाइएको थियो । त्यस टोलीले मुलघाटस्थित चौकीमा सखुवाको काठ राखेर थप अनुसन्धानका लागि सवारी साधन पकलीतर्फ लगिएको स्रोतले जनाएको छ ।
मंगलबार राति घटना बाहिर आएपछि घटनामा संलग्न सशस्त्र प्रहरी अरुण गुल्म संखुवासभाका प्रहरी नायव उपरीक्षक रामप्रसाद भण्डारीलाई पकलीस्थित बाहिनीमा तानिएको छ । सशस्त्र प्रहरीले अवैध काठ नियन्त्रणमा लिएको भने पनि आफुलाई कुनै जानकारी नआएको जिल्ला वन कार्यालय धनकुटाका प्रमुख कृष्णप्रसाद वस्तीले बताए ।
संखुवासभाबाट अनिष विस्टको सहयोगमा
प्रतिक्रिया दिनुहोस !
