काठमाडौं : मानवअधिकारवादी नेता कृष्ण पहाडीले नेपाली कांग्रेसले भ्रष्टाचार मुद्दामा मुछिएका उपसभापति तथा तत्कालीन भौतिक योजनामन्त्री विजयकुमार गच्छदारको पक्षमा वकालत गर्नु आपत्तीजनक र आत्मघाती हुने बताएका छन्।
भ्रष्टाचारको मामलामा अन्तराष्ट्रिय तथा राष्ट्रियस्तरमै खराब छवि बनाएका गच्छदारको पक्षमा कांग्रेसले बोल्नु आपत्तीजनक र आत्मघाती हुने कुरा कांग्रेसले बेलैमा बुझ्नु पर्ने उनकाे भनाइ छ । 'गच्छदारलाई मुद्दा चलाएको आधारमा कांग्रेसले संसद अवरुद्ध गर्नु खेदजनक र दुभाग्यपूर्ण छ', उनले भने ।
‘अख्तियारले मुद्दा चलाउनु थोरै स्वागत योग्य छ। तर ललितानिवास जग्गा प्रकरणका मुल पात्र पूर्वप्रधानमन्त्रीद्वय माधवकुमार नेपाल र डा. बाबुराम भट्टराईलाई मुद्दा नचलाउनु नै अख्तियारको नियतमा शंका पैदा भएको छ’, पहाडीले अन्नपूर्ण अनलाइसँग भने। राजनीतिक दबाबका कारण नेपाल र भट्टराईलाई जोगिएको उनको धारणा थियो। कांग्रेसले नेपाल र भट्टराईलाई मुद्दा चलाउन कांग्रेसले शान्तिपूर्ण दबाब दिनुपर्ने बताए।
ललितानिवासका सन्दर्भमा नीतिगत रुपमा जिम्मेवार नेता नेपाल र भट्टराईलाई मुद्दा नचलाउनु दुर्भाग्यपूर्ण रहेको उनको भनाइ छ। ‘यसले रातो टोपी लगाएपछि सबैलाई माफ हुन्छ भन्ने भनाइलाई चरितार्थ गर्छ।’ उनले देशभरीकै सार्वजनिक जग्गा हडप्नेको चलखेल, राजनीतिक र न्यायिक क्षेत्रका मान्छेहरुको फेहेरिस्त लामो रहेको बताए।
सरकारले अधिग्रहण गरेको १ सय १२ रोपनी जग्गा व्यक्तिको नाममा दर्ता गरी हिनामिना गरेको अभियोगमा अख्तियारले गच्छदारसहित १ सय ७५ जनालाई बुधबार ललितानिवास जग्गा प्रकरणमा मुद्दा दायर गरेको थियो। गच्छदारविरुद्ध ९ करोड ६५ लाख ७६ हजार बिगो दाबी गरेको छ। उनीमाथि भ्रष्टाचार निवारण ऐन २०५९ बमोजिम सजाय हुनेछ।
त्यसैगरी पूर्वमन्त्री चन्द्रदेव जोशीविरुद्ध ७ करोड ८ लाख ४८ हजार, डम्बर श्रेष्ठमाथि ९ करोड ६५ लाख ७६ हजार रुपैयाँ बिगो दाबी अख्तियारले गरेको छ। पूर्वसचिव छविराज पन्तविरुद्ध ९ करोड ६५ लाख ७६ हजार बिगो दाबी गरेको छ भने अख्तियारकै पूर्वआयुक्त दीप बस्न्यातविरुद्ध ९ करोड ६५ लाख ७६ हजार बिगो दाबी गरिएको छ।
लेखक तथा पूर्वसचिव दिनेश अधिकारीमाथि ७ करोड आठ लाख ४८ हजार बिगो दाबी गरिएको छ । बिचौलिया शोभाकान्त ढकालविरुद्ध ३९ करोड २७ लाख ६८ हजार र अर्का बिचौलिया रामकुमार सुवेदी ५२ करोड, ५१ लाख ४० हजार, भाटभटेनीका सञ्चालक मीनबहादुर गुरुङमाथि ५० करोडमाथि बिगो दाबी अख्तियारले गरेको छ।
प्रतिक्रिया दिनुहोस !
