आगामी जेठ ३१ देखि रसियामा सुरु हुने विश्वकप फुटबल प्रतियोगिताको रौनक विश्वभर नै छाउन थालिसकेको छ । यसबाट नेपाली फुटबलप्रेमी पनि अछुतो रहन सकेका छैनन् । सधैं राजनीतिक खिचातानीमा व्यस्त रहने विभिन्न राजनीतिक दलका नेताहरूमा पनि विश्वकप नजिकिँदै जाँदा फुटबल फिभर बढ्दै गएको छ भन्दा अत्युक्ति नहोला ।
नेपाली कांग्रेसका युवा नेता उदयशमशेर राणाले आठ वर्षको उमेरदेखि नै विश्वकप फुटबल हेर्दै आएका हुन् । सन् १९७८ मा अर्जेन्टिनामा भएको उक्त खेलमा अर्जेन्टिनाले हल्यान्डविरुद्ध ३-१ को अन्तरले विजय हासिल गरेको थियो । त्यतिबेला आफ्ना बाबुसँग बेलायतमै बस्दै आएका राणाले त्यहीँ पहिलो विश्वकप हेरेका थिए । सन् १९८२ मा स्पेनमा विश्वकप हुँदा उनी भारतमा होस्टेलमा बसेर पढ्दै थिए । त्यतिबेला होस्टेलमा टेलिभिजनको त्यति सुविधा नहुने भएकाले योे विश्वकप उनले हेर्न पाएनन् । यो बाहेकका आजसम्म भएका विश्वकप उनले छुटाएका छैनन् । कुनै खेल घरमा त कुनै साथीभाइसँग भने कुनै बारमा गएर हेर्न रुचाउने नेता राणाले अहिलेसम्म हेरेको विश्वकपमध्ये मेक्सिकोमा भएको सन् १९८६ को विश्वकप सबैभन्दा राम्रो लागेको बताउँछन् । त्यतिबेला अर्जेन्टिना भर्सेस इङ्ल्यान्डको खेलमा विश्वचर्चित खेलाडी म्याराडोनाको प्रस्तुतिलाई विश्वभरका उनका प्रशंसकले रुचाएका थिए । उनै प्रशंसकमध्येका एक राणालाई आगामी विश्वकपमा पनि उतिबेलाकै जत्तिकै उत्कृष्ट खेल हेर्ने चाहना छ ।
खेलमा बाजी राख्ने चलन छैन, राणाको । यसपालि कसलाई समर्थन गर्ने हो भन्ने उनले निधो गरिसकेका छैनन् । इङ्ल्यान्डको खेल उनलाई मनपर्छ । तर यसपटक यो टिमलाई फाइनलमा पुग्न गाह्रो भएको उनको अनुमान छ । ‘त्यसैले ब्राजिललाई सपोर्ट गर्छु होला’, उनले भने ।
विश्वकपले नेताहरूको राजनीतिक खेललाई पनि फिका बनाइदिन्छ । यसभन्दा अघिल्लो विश्वकपताका खसी काटेर खाँदै वल्र्डकप हेरेको नेपाल कम्युनिस्ट पार्टीका नेता दामोदर अर्यालले बिर्सेका छैनन् । पार्टीको केन्द्रीय युवा तथा खेलकुद विभागका सचिवसमेत रहेका उनले सबै साथीभाइसँग मिलेर प्रोजेक्टर नै राखी खाँदै पिउँदै वल्र्डकपका खेलहरू हेरेका थिए । प्रायःजसो सबै वल्र्डकप हेर्दै आएका अर्याललाई पहिलेदेखि नै अर्जेन्टिनाको खेल साह्रै मन पथ्र्यो । खेलाडीभन्दा पनि उनको रुचि देशप्रति नै हुने गर्छ । ‘खेलाडीप्रति मेरो क्रेज छैन’ भन्ने अर्याल यो वर्ष भने अर्जेन्टिना र जर्मनीलाई फाइनलमा पुगेको हेर्न चाहन्छन् । अर्जेन्टिना अरूभन्दा अलि गरिब राष्ट्र भएकाले पनि उसप्रति अर्यालको सामीप्यता बढेको हो । जर्मनीको भने खेलको गुणस्तर नै राम्रो भएकाले आफूलाई पहिलेदेखि नै मनपर्ने उनले बताए । यी दुई देश अन्तिम चरणमा पुगे खेल रोचक हुने भएकाले दर्शकलाई पनि रमाइलो हुने उनको भनाइ छ ।
विश्वकपले नेताहरूको राजनीतिक खेललाई पनि फिका बनाइदिन्छ । यसभन्दा अघिल्लो विश्वकपताका खसी काटेर खाँदै वल्र्डकप हेरेको नेपाल कम्युनिस्ट पार्टीका नेता दामोदर अर्यालले बिर्सेका छैनन् ।
अर्जेन्टिना र त्यसमा पनि जर्सी नम्बर १० मेस्सीले खेलेको असाध्यै मनपर्छ, सांसद नवीना लामालाई । यस वर्षको विश्वकप फुटबलको फाइनल खेल हेर्न विदेश नै जाने इच्छा थियो उनको । तर बेफुर्सदी भएका कारण त्यसको व्यवस्था मिलाउन नसकेका उनले गुनासो गरिन् । उनी अर्जेन्टिनाको फ्यान भए तापनि अमेरिका र ब्राजिलको खेल पनि उत्तिकै मनपर्छ । विगत एक दशकदेखि वल्र्डकप हेर्दै आएकी लामा सुरुदेखिका खेलहरू हेर्न नभ्याए पनि सेमी फाइनलपछिका खेलहरू सकेसम्म नछुटाउने विचारमा छिन् । अघिल्लो विश्वकप हेर्न सिटी सेन्टरमा पुगेकी नवीनाले यस वर्ष विश्वकप विजेताको रूपमा जर्मनीको सम्भावना बलियो देखेकी छिन् ।
जर्मनी र ब्राजिल टिमको अर्की समर्थक हुन्, नेपाली कांग्रेसकी सांसद सरिता प्रसाईं । राष्ट्रियसभा सदस्य प्रसाईं आफैं मार्सल आर्टकी ब्ल्याकबेल्ट प्राप्त खेलाडी पनि हुन् । फुटबलमा भने उनलाई मन पर्ने खेलाडी म्याराडोना हुन् । हाल काम व्यस्तताले जिल्लामा रहेकी सांसद प्रसाईंले भनिन्, ‘फुटबल सुरु भएपछि त हेर्न परिहाल्यो नि ।’ उनको घरमा सबै परिवार मिलेर विश्वकप हेर्छन् । कोही कुन टिमको समर्थक हुन्छन् त कोही कुन टिमको । त्यसैले एउटाले एउटा टिमको त अर्कोले अर्कै टिमको लागि हुटिङ गर्ने हुनाले फुटबल हेर्दा रमाइलो लाग्छ, उनलाई । कुनै पनि देश विशेषको समर्थन नगर्ने उनी राम्रो खेल्ने देशले जितोस् भन्ने चाहना राख्छिन् ।
काम विशेषले गाउँगाउँमा जानुपर्ने हुन्छ राप्रपा नेत्री कुन्ती शाहीलाई । यद्यपि बत्तीको लाइन र टेलिभिजन भएको ठाउँमा रहेसम्म वल्र्डकप हेर्न छुटाउन्न् उनी । पहिलो चरणका खेलदेखि नै उनी विश्वकप हेर्न थाल्छिन् । तर आफूलाई मनपर्ने टिमहरू आएपछि खेल अझै रोचक लाग्ने र हेर्दा मजा आउने उनको अनुभव छ ।
२२÷२३ वर्षको उमेरसम्म सांसद राजकाजी महर्जन आफैं फुटबल खेल्थे । ललितपुर ३ नं क्षेत्र (१) का सांसद महर्जनकै पहलमा प्रदेशसभाबाट करिब १० करोडको बजेट खेलकुद प्रवद्र्धनका लागि छुट्याइएको छ । करिवबचार करोड रुपैयाँ विभिन्न कभर्ड हल, फुटबलको मैदान बनाउने र युवालाई फुटबल खेल्ने वातावरण सिर्जना गर्ने काममा खर्च गरिने उनले बताए । यसरी फुटबलमा आफ्नो गहिरो रुचि रहेकै कारण खेलको प्रवद्र्धनमा आफू लागेको उनले बताए ।
विश्वकप खेल प्रसारण हुँदा चोकचोकमा सबै भेला भएर व्यवस्थित तरिकाले खेल हेर्ने वातावरण पनि मिलाइदिएका छन्, सांसद महर्जनले । यसरी सबै मिलेर हेर्दा हाहाहुहुको मज्जा बेग्लै लाग्छ, उनलाई । पानीमा रुज्दै भिज्दै भए पनि खेल हेर्न नछुटाएको अनुभव उनीसँग ताजै छ । अर्जेन्टिनाको टोलीमा टिम वर्क राम्रो रहेको, खेलाडी राम्रा र पुरानो अनुभवी टोली भएकाले उनी अर्जेन्टिनाकै समर्थक हुन् । फाइनलमा ब्राजिलसँग अर्जेन्टिनाले भिडेको हेर्ने उनको चाहना छ ।
प्रतिक्रिया दिनुहोस !
