गोरखा : प्रतिबन्धित जडिबुटी पाँचऔंले तस्करीमा संलग्न धार्चे ५ गुम्दाका कमल गुरुङलाई जिल्ला अदालत गोरखाले तीन करोड ९० लाख ७६ हजार रुपियाँ जरिबानासहित एकवर्ष कैद सजाय सुनाएको छ । जिल्ला न्यायधीश वसन्तराज पौडेलको इजलासले वन ऐन २०४९ को दफा ४९ (घ) अनुसार फैसला गरिएको जिल्ला अदालत गोरखाका सुजन श्रेष्ठले जानकारी दिए । गुरुङ यसअघि पुर्पक्षका लागि थुनामै थिए ।
उत्तरी गोरखाका विभिन्न भेगबाट पाँचऔंले संकलन गरी काठमाडौं लैजान लागेको अवस्थामा प्रहरीले उनलाई आरुघाट बजारबाट पक्राउ गरेको थियो । त्यहाँको इलाका प्रहरी कार्यालयको टोलीले ७४.५ किलोग्राम पाँचऔंलेसहित असोज ३१ गते उनलाई पक्राउ गरेको थियो । आठवटा बोरामा राखेर पाँचऔंले ओसारपसारमा प्रयोग भएको सो बसका धनी र चालकलाई भने अदालतले सफाइ दिएको अदालतले जनाएको छ ।
पाँचऔंले दुर्लभ तथा प्रतिवन्धित जडिबुटीमा पर्छ । यसको संकलन, ओसारपसार र बिक्रीवितरण गर्दा दुर्लभ वन्यजन्तु तथा वनस्पतिको व्यापार तथा ओसारपसार सम्बन्धी महासन्धी (साइटिस) १९७३ प्रभावित हुने जिल्ला वन अधिकृत जीवनाथ पौडेलले जानकारी दिए । ‘एकलाख ९७ हजार थान पाँचऔंलेसहित ४९ बर्षिय गुरुङ पक्राउ परेका थिए’, पौडेलले भने, ‘प्रतिगोटा एकहजार रुपियाँका दरले जरिबाना मागदावीसहित कार्यालयले मुद्धा दर्ता गरेको थियो । सोहीअनुसार फैसला भयो ।’ बरामद भएको पाँचऔंले सुरक्षित राखिएको जिल्ला वन अधिकृत पौडेलले जानकारी दिए ।
प्रतिक्रिया दिनुहोस !
