पहिरोले मेची राजमार्गसहित आधा दर्जन सडक अवरुद्ध
ताप्लेजुङः विहीबार रातिको अविरल वर्षाका कारण गएको पहिरोले ताप्लेजुङको मेची राजमार्गसहित आधा दर्जन ग्रामिण सडकको केही खण्ड बगाएको छ ।
हाङ्देवा खोलामा आएको बाढीले बगाएर एकजना बेपत्ता भएका छन् । राति विश्वकप फुटबल हेरेर मोटरसाइकलमा फर्कने क्रममा फुङलिङ नगरपालिका–९ मा रहेको हाङ्देवा खोलाले बगाउँदा इलाम घर भएका २६ वर्षीय सनम राई बेपत्ता भएका हुन् ।
जिल्ला प्रहरी कार्यालय ताप्लेजुङका प्रमुख ज्ञानेन्द्रबहादुर बस्नेतका अनुसार राई चढेको मोटरसाइकल केही तल भेटिएको र उनको खोजी कार्य भरहेको छ ।
राई फुङलिङ बजारस्थित पाथीभरा मोटरसाइकल वर्कसपमा कार्यरत थिए । यसैबीच पहिरोले फुङलिङ नगरपालिका–३ केनेमस्थित फुङलिङ–दोभान सडक खण्ड तीन ठाउँमा अवरुद्ध बनाएको छ ।
माथिबाट माटोको लेदो झरी बाटो अबरोध भएको हो । सोही सडकखण्डको भारी खोलामा खोला बाढी आएर सडक बगाएको छ । दुवै स्थानमा अस्थायी प्रहरी चौकी सिम्लेबाट प्रहरी टोली पुगेको छ ।फुङ्लिङ दोभान सडक खण्डकै बहानन्दे छेउमा पहिरोले २० मिटर सडक बगाएको प्रहरीले जनाएको छ । यता मेची राजमार्गको फुङ्लिङ–सुकेटारखण्डस्थित उकालिपानीमा सडकदेखि १० मिटर माथिबाट माटो झरी बाटो अवरुद्ध भएको छ ।
पहिरोले ग्रामिण सडकहरु पनि अवरुद्ध भएका छन् । पाथिभरा याङबरक गाउँपालिका–२ थेचम्बुस्थित विर्तामोड–थेचम्बु सडक खण्डमा सडकदेखि १० मिटरमाथिबाट पहिरो झरेर बाटो अबरोध भएको छ ।
त्यस्तै फुङलिङ नगरपालिका–१० फुरुम्बुमा उत्तर–दक्षिण लोकमार्गको तापेथोक–सदरमकाम सडकखण्डमा गोल्छे खोलाले २० मिटर बाटो बगाएको प्रहरीले जानकारी दिएको छ । पहिरो गएको सबै ठाउँमा प्रहरी टोली खटिएको प्रहरी प्रमुख बस्नेतले बताए । ताप्लेजु गएराति यस वर्षकै ठूलो वर्षा भएको थियो ।