मस्को : रुस विश्वकपमा शुक्रबार दुई पटकको उपाधि विजेता टोली उरुग्वे र २८ वर्षपछि विश्वकप फुटबलमा फर्किएको इजिप्टबीच प्रतिस्पर्धा हुँदैछ । समूह ‘ए’को यो खेल नेपाली समयअनुसार ५ः४५ बजे सुरु हुनेछ । प्रतियोगिताको प्रिक्वार्टरफाइनल सम्भावना बलियो बनाउन दुवै टोलीले आफ्नो पहिलो खेलमा जितको रणनीति बनाएका छन् । यद्यपि बलियो उरुग्वेविरुद्ध इजिप्टले आफ्नो चोटग्रस्त मुख्य स्ट्राइकर मोहम्मद सलाहको साथको अपेक्षा गरिरहेको छ ।
इजिप्ट उनै सलाहको सशक्त प्रदर्शनमा रुस विश्वकपका लागि छनोट भएको टोली हो । सन् २०१२ तिर घरेलु प्रतियोगिताका क्रममा ७३ जनाको ज्यान जाने गरी स्टेडियमभित्रैै भएको झडपपछि दुई वर्षको प्रतिबन्ध बेहोरेपछि ध्वस्त बनेको इजिप्टको फुटबललाई उनै सलाहले विश्वकपसम्म डोहोर्याएका हुन् । त्यसका लागि इजिप्टले सन् १९९० को विश्वकप खेलेयता २८ वर्षसम्म कुर्नु पर्यो ।
त्यसैले इजिप्ट आफ्नो रुस विश्वकप यात्रालाई सफल बनाउन चाहन्छ । तर, रियल म्याड्रिडविरुद्ध भएको युरोपियन च्याम्पियन्स लिगको फाइनल खेलका क्रममा घाइते भएका सलाहले उरुग्वेविरुद्ध खेल्ने अझै निश्चित छैन । यद्यपि बिहीबार आयोजित पत्रकार सम्मेलनमा प्रशिक्षक हेक्टर कुपरले सलाह पूर्ण फिट रहेको र उरुग्वेविरुद्ध पनि उनको साथ रहने बताएका छन् । प्रशिक्षक कुपरले सलाहले खेल्ने वा नखेल्नेबारे भने स्पष्ट बोलेका छैनन् ।
उनी बिनाको इजिप्टलाई सन् १९३० र सन् १९५० को विश्वकपको उपाधि जितेको उरुग्वेविरुद्धको खेल वास्तवमै कठिन हुनेछ । फ्रान्सेली क्लब पेरिस सेन्ट जर्मन (पीएसजी)का मुख्य स्ट्राइकर एडिन्सन काभानी र स्पेनिस क्लब बार्सिलोनाका स्ट्राइकर लुइस स्वारेजजस्ता प्रभावशाली खेलाडी रहेको उरुग्वे समूहमा निकै बलियो टोली हो ।
रुस विश्वकपको तयारीस्वरूप खेलिएको पछिल्लो खेलमा उरुग्वेले जितको लयलाई कायमै राखेको छ भने इजिप्टले निरन्तर कमजोर प्रदर्शन गरेको छ । उरुग्वेले आफ्ना पछिल्ला ६ मध्ये केवल एक खेलमा पराजय बेहोरेको छ । इजिप्टले भने पछिल्ला ६ मध्ये कुनै पनि खेलमा जित हात पार्न सकेको छैन । यी दुई टोलीबीच भने यसअघि कुनै पनि आधिकारिक प्रतियोगितामा भेट भएको छैन । अहिलेसम्म सन् २००६ मा भएको एउटा मैत्रीपूर्ण खेलमा मात्र यी दुई टोलीबीच भेट भएको छ । उक्त खेलमा उरुग्वे २-० गोलले विजयी भएको थियो ।
विगतमा यी दुई
उरुग्वे २ इजिप्ट ०
(सन् २००६, मैत्रीपूर्ण खेल)
उरुग्वे
विश्वकप सहभागिता :१३औं पटक
उपलब्धि :उपाधि (सन् १९३० र सन् १९५०)
फिफा वरीयता :१२
इजिप्ट
विश्वकप सहभागिता :तेस्रोपटक
उपलब्धि :समूहगत चरण (सन् १९३४ र सन् १९९०)
फिफा वरीयता :४५
प्रतिक्रिया दिनुहोस !
