विश्वकप : केही बेरमै शनिबारको पहिलो खेलमा फ्रान्स र अस्ट्रेलियाको भिडन्त

मस्को : रुस विश्वकपअन्तर्गत उपाधिको दाबेदार मानिएको फ्रान्सले शनिबार एसियन टोली अस्ट्रेलियासँग खेल्दैछ । समूह ‘सी’अन्तर्गत काजन एरेनामा हुने खेल नेपाली समयअनुसार ३:४५ बजे सुरु हुनेछ ।

बलियो फ्रान्सविरुद्धको यो खेल अस्ट्रेलियाका लागि परीक्षा नै हुने छ । सायद यही खेलले अस्ट्रेलिया प्रतियोगितामा अघि बढ्ने वा समूहगत चरणबाटै घर फर्कने संकेत मिल्नेछ । किनभने फ्रान्सको यो टोली निकै सशक्त देखिएको छ । रुस विश्वकपमा छनोट भएका टोलीमध्ये बलियो रक्षापंक्ति मानिएको फ्रान्ससँग अग्रपंक्तिमा पनि एन्टोइन ग्रिजम्यान, केलिएन एम्बाप्पेजस्ता प्रतिभाशाली खेलाडी छन् ।

फ्रान्स युरोपेली छनोट प्रतियोगिताको समूह ‘ए’को विजेता बन्दै रुस विश्वकपका लागि छनोट भएको टोली हो । अस्टे«ेलियाले भने रुस विश्वकपको सहभागिता पक्का गर्न एसियाली र महादेशीय प्ले अफसमेत खेल्न परेको थियो । फ्रान्सविरुद्धको अघिल्लो भेटको नतिजाले समेत अस्ट्रेलियालाई मुस्किल देखिएको छ । यी दुई टोलीले आधिकारिक प्रतियोगितामा भने एकपटक मात्रै प्रतिस्पर्धा गरेका छन् । सन् २००१ को कन्फिडेरेसन कपअन्तर्गत भएको खेलमा अस्ट्रेलिया फ्रान्ससँग १-० ले पराजित भएको थियो । सबै खाले प्रतियोगितामा गरी हालसम्म चारपटक प्रतिस्पर्धा गर्दा फ्रान्सले दुई तथा अस्ट्रेलियाले एकपटक जित हात पारेका छन् । एक खेल बराबरीमा रोकिएको छ ।

त्यसयता रुस विश्वकपको तयारीस्वरूप खेलिएको खेलमा भने दुवै टोलीको प्रदर्शन लगभग उस्तै छ । फ्रान्सले रुस विश्वकप छनोट पक्का गरेपछि खेलेका सातमध्ये मात्र एक खेलमा पराजय बेहोरेको छ । चार खेलमा जित हात पार्दा दुई खेलमा बराबरीको नतिजा निकालेको छ । अस्ट्रेलियाले पनि रुस विश्वकप छनोटपछि खेलेका चारमध्ये मात्र एक खेलमा पराजय बेहोरेको छ । दुई खेलमा जित हात पार्दा एक खेलमा बराबरी खेलेको छ ।

हेड टु हेड

कुल खेल : ४

फ्रान्स विजयी : २

अस्ट्रेलिया विजयी : १

बराबरी : १

फ्रान्स

विश्वकप सहभागिता : १५औं पटक

उपलब्धि : उपाधि (१९९८)

फिफा वरीयता : ७

अस्ट्रेलिया

विश्वकप सहभागिता : पाचौंपटक

उपलब्धि : प्रिक्वार्टरफाइनल (२००६)

फिफा वरीयता : ३६

डेनमार्कविरुद्ध पेरु

रुस विश्वकप फुटबलअन्तर्गत शनिबार नै युरोपेली टोली डेनमार्क र दक्षिण अमेरिकी टोली पेरु पनि भिड्दै छन् । लगभग उस्तै स्तरका देखिएका यी दुई टोलीबीचको प्रतिस्पर्धा रोमाञ्चक हुने अपेक्षा गरिएको छ । मोर्दाेभिया एरेनामा हुने समूह ‘सी’अन्तर्गतको यो खेल नेपाली समयअनुसार ९:४५ बजेपछि सुरु हुनेछ ।

संयोग के भने यी दुवै टोली प्ले अफमार्फत रुस विश्वकपसम्म पुगेको हो भने दुवै टोलीको यो पाँचौं विश्वकप सहभागिता हो । रुस विश्वकप अन्तर्गतको यो खेल यी दुई टोलीबीचको कुनै पनि प्रतियोगिताको पहिलो प्रतिस्पर्धा हुनेछ । यी दुई टोलीले यसअघि एकअर्काविरुद्ध कुनै खेल खेलेका छैनन् । रुस विश्वकपको तयारीस्वरूप खेलिएको पछिल्ला खेलको नतिजाले भने पेरुलाई बलियो टोली देखाएको छ ।

डेनमार्कले आफ्नो पछिल्लो चार तथा पेरुले आफ्नो पाँच खेलमा पराजय बेहोरेको छैन । यद्यपि यस बीचमा डेनमार्कले दुई मात्रै जित हात पार्दा पेरुले चार खेलमा जित हात पारेको छ ।