विराटनगर : पर्व बिदा कटौतीको विरोधमा मुस्लिम धर्मावलम्बीले हातमा कालोपट्टी बाँधेर इदउल फित्र मनाएका छन् । इदका दिन दिइँदै आएको सार्वजनिक बिदा कटौतीको विरोध गर्दै उनीहरूले मोरङको विराटनगरमा कालोपट्टी बाँधेरै नमाजसमेत पढेका छन् ।
प्रदेश नम्बर १ का मुस्लिम अगुवाले सरकारले इदको बिदा कटौती गरी धार्मिक पहिचान समाप्त गर्न लागेको भन्दै असन्तुष्टि व्यक्त गरेका छन् । मुस्लिम समुदायले इद, बकर इद, इजरत पैगम्बर मोहम्मद साहबको जन्मजयन्ती र इस्लाम नया“ वर्ष मोहरम पर्वमा बिदा दिर्नुपर्ने माग गर्दै आएका छन् । सरकारले इद, बकर इद, मोहम्मद जयन्तीमा दिइँदै आएको सार्वजनिक बिदा कटौती गरेको थियो ।
मोरङ मुस्लिम समाजका अध्यक्ष साहब खहमद (गुडु)ले धर्मनिरपेक्ष मुलुकमा मुस्लिमप्रति विभेद भएको बताए । ‘हामीले यसको विरोधस्वरुप हातमा कालोपट्टी बाँधेर प्रार्थना गरेका हौं’, उनले भने । सरकारले मुस्लिमकोे धर्म र पहिचान समाप्त पार्न लागेको जिकिर गर्दै उनले चरणबद्ध आन्दोलन गर्ने चेतावनी दिए ।
मुस्लिम अगुवा जफर अहमद जमालीले भाइचारा बढाउने र विश्व शान्तिको कामना गर्ने दिनमा मुस्लिम समुदायले पहिचान स्थापित गर्न कालोपट्टी बाँध्नु दुर्भाग्य भएको बताए ।
इदउल फित्रका अवसरमा इदगाहमा जम्मा भएर सामूहिक नमाज पढ्दा सबैले हातमा कालोपट्टी बाँधेका थिए । दिनभर एक महिनासम्म कठोर व्रत (रोजा) बसी पाँचपटक नमाज पाठ गर्ने चलन छ । शुक्रबार साँझ चन्द्रमा देखेपछि रोजा समाप्तिको खुसियालीमा उनीहरूले शनिबार इद–उल–फित्र मनाएका हुन् । यो क्रम तीन दिन जारी रहने गरेको मुस्लिम अगुवाले बताएका छन् ।
मस्जिद तथा इदगाहमा जम्मा भएर नमाज पाठ गरी बधाई, शुभकामना आदानप्रदान गरी गला मिलाएर खुसियालीसँग यो पर्व मनाइन्छ । अरबी पात्रो हिजरीको ‘रमजानुल मुबारक’ महिनाभर रोजा बसेपछि यो पर्व मनाइन्छ । इदका दिन बिहान नुहाइधुवाइ गरी नयाँ कपडासहित बास्नादार अत्तर लगाएर इदको नमाज ‘अदा’ गर्न मुस्लिम धर्मावलम्बी इदगाह वा मस्जिद जान्छन् । इदगाह (खुला स्थान) वा मस्जिदमा भेला भएर समूहमा नमाज पढेपछि एकआपसमा गला मिलाएर इद मुबारक भन्दै शुभकामना आदानप्रदान गरिन्छ ।
प्रतिक्रिया दिनुहोस !
