दमक : गाँउ तथा शहर बजारमा आफूलाई असुरक्षित महशुुस गर्न थालेपछि जुवाडेहरु जंगल पस्न थालेका छन् । झापाको शिवसताक्षी स्थित जंगलमा जुवा खेलिरहेका जुवाडेहरु प्रहरीको फन्दामा परेपछि यस्तो तथ्य बाहिर आएको हो ।
घरमा खेल्दा असुरक्षित हुने डरले जुवा खेल्नै भनेर जंगल छिरेका तीन जुवाडेलाई प्रहरीले पक्राउ गरेको छ । जुवाको खालवाट १ लाख ९ हजार ९ सय ९० रुपैयाँ समेत बरामद गरेको छ । त्यस्तै जुवाको खाल नजिकै जुवाडेले पार्किङ्ग गरेका तीन थान कार र ५ थान मोटरसाइकल पनि प्रहरीले बरामद गरेको छ ।
आइतबार साँझ नगरको ११ नम्बर वडा स्थित जंगलमा जुवा खेलिरहेको गोप्य सूचनाको आधारमा उनीहरुलाई पक्राउ गरेको जिल्ला प्रहरी कार्यलय झापाले बताएको छ ।
सादा पोसाकमा खटिएको प्रहरीको टोलीले जुवाको खालबाट शिवसताक्षी– ८ का सुमन गुप्ता, कनकाई नगरपालिका–६ का कुलवहादुर दर्नाल र अर्जुनधारा नगरपालिका– ६ का शन्तोष विकलाई पक्राउ गरेको जिल्ला प्रहरी कार्यलय झापाका सूचना अधिकृत प्रहरी नायव उपरीक्षक जितेन्द्र कुमार बस्नेतले जानकारी दिए ।
जुवा खेलिरहेको सूचना प्रहरीलाई आएलगत्तै प्रहरीले छापा मारेको थियो । जुवाको खालमा प्रहरी पुग्ने बित्तिकै अन्य जुवाडेहरु भागेका थिए । फरार हुनेमा जिल्लाका प्रतिष्ठित व्यापारी तथा नेताहरु रहे पनि उनीहरुको नाम प्रहरीले सार्वजनिक गरेको छैन । पार्किङमा कार भेटिनुले ठुलै ब्यक्ति जुवामा संलग्न भएको आशंका गरिएको छ ।
प्रहरीका अनुसार सताक्षीधामको पिकनिक स्पोर्ट पूर्वको सामुदायिक वनभित्रको जंगलमा यसअघि पनि पटक पटक जुवा खेल्ने गरेको प्रहरीलाई सूचना प्राप्त भए पनि जुवाडे पक्राउ गर्न सफल भएको थिएन ।
जिल्ला प्रहरी कार्यलय झापाका अनुसार जुवाको खालवाट ४ हजार २ सय ६० भारतीय, र अमेरिकन ५ डलर समेत बरामद भएको छ । जिल्ला प्रहरी कार्यलय झापाका अनुसार बरामद भएका कारमा बा १५च १९६७, बा १३च १४७५ र मे१च ४३८९ नम्बरका कार रहेका छन् । यस्तै मे८प १९१२, मे१०प ३६, मे५प ६५६३, मे३प ५७६९ र मे९प २९७२ नम्बरका मोटरसाइकल पनि बरामद गरिएको जिल्ला प्रहरी कार्यलय झापाले जनाएको छ । पक्राउ परेका व्यक्तिहरुलाई जुवा ऐन अनुसार कारवाहीको तयारी गरिएको छ । उनीहरु सबैलाई इलाका प्रहरी कार्यलय झिलझिलेमा अनुसन्धानका लागि राखिएको प्रहरीले जनाएको छ।
प्रतिक्रिया दिनुहोस !
