हेटौंडा : निर्वाचनमा पराजयपछि डाकिएको कांग्रेसको जिल्ला सभापति भेला शुक्रबारसम्म लम्बिएको छ । शुक्रबार हेटौंडा घोषणापत्र जारी गर्ने तयारी गरिरहेको भेलाले पार्टी रूपान्तरणको घोषणा गर्ने प्रवक्ता विश्वप्रकाश शर्माले जानकारी दिए ।
‘सभापति भेलाले मुख्य रूपमा पार्टीको केन्द्रदेखि स्थानीय तहसम्म रूपान्तरणको घोषणा गर्नेछ’, प्रवक्ता शर्माले भने, ‘कांग्रेसले पार्टीभित्र अनुशासन कसरी कायम गर्ने र केन्द्रीय, प्रादेशिक तथा स्थानीय तहको सरकारसँग प्रतिपक्षीका रूपमा कसरी प्रस्तुत हुने भन्ने समेत घोषणापत्रमार्फत बोल्ने छ ।’
पार्टी रूपान्तरण गर्न केन्द्रदेखि स्थानीय तहसम्म पुनर्गठन गर्ने पनि कांग्रेसले जनाएको छ । शर्माका अनुसार रूपान्तरणका लागि आवश्यक पर्ने विधान संशोधन कांग्रेसले आउँदो महासमिति भेलाबाट गर्ने छ । तर महासमिति भेला भने अझै अनिश्चित छ ।
बिहीबार साँझसम्म जिल्ला सभापतिहरूले बोल्ने क्रम नसकिएपछि भेला निर्धारित समयभन्दा एक दिन पर सरेको हो । बन्द सत्रमा बुधबार र बिहीबार जिल्ला सभापतिहरूले आ–आफ्ना धारणा राखेका थिए । शुक्रबार बिहान सभापतिहरूले प्रादेशिक स्तरमा प्रतिवेदन पेश गर्ने कार्यतालिका छ ।
प्रादेशिक स्तरको प्रतिवेदन पेश भएपछि पार्टी सभापति शेरबहादुर देउवाले भेलामा उठेका प्रश्नमाथि जवाफ दिने कार्यक्रम छ । ‘त्यसपछि भेलाको समापन कार्यक्रम हुनेछ’, प्रवक्ता शर्माले भने, ‘शुक्रबार बिहानसम्म हेटौंडा दस्तावेज तयार हुनेछ ।’
बन्द सत्रमा बोल्ने अधिकांश जिल्ला सभापतिहरूले पार्टी रूपान्तरणको प्रक्रियामा जानुपर्ने र केन्द्रीय नेतृत्वमा एकता देखिनुपर्नेमा जोड दिएका थिए ।
हिन्दू राष्ट्रका पक्षमा समेत आवाज
भेलामा आधा दर्जन जिल्ला सभापतिले कांग्रेस हिन्दु राष्ट्रका पक्षमा जानु पर्ने धारणा राखे । पर्सा, दाङ, अछाम, डडेलधुरासहित ६ जिल्ला सभापतिले धर्मनिरपेक्षताको विरोध गरेका हुन् ।
प्रवक्ता शर्माले केही सभापतिहरूले हिन्दु राष्ट्रबारे धारणा राखेको स्विकारे । उनले भने, ‘हामीले बोल्न निषेध गरेका थिएनौं । केही सभापतिले हिन्दु राष्ट्रका पक्षमा पनि बोल्नुभएको थियो । तर हामीले संविधानले गरेको व्यवस्थालाई चुनौती दिने काम गर्दैनौं ।’
प्रतिक्रिया दिनुहोस !
