रियाद : साउदी अरेबियाका महिलाहरूले आफैं सवारीसाधन चलाउन पाउने भएपछि आइतबार खुशी मनाएका छन् ।शनिबार मध्यरातमा शाही घोषणामार्फत महिलाले पनि सवारीसाधन चलाउन पाउने अधिकार दिइएको हो । यो घोषणापछि साउदी अरेबिया र उनीहरूसँगै विश्वभरकै महिलाले खुशी व्यक्त गरेका छन् ।
महिलाहरूलाई सवारीसाधन चलाउन अहिलेसम्म बन्देज लगाउनेमा विश्वको एउटा मात्र मुलुक साउदी अरेबिया बाँकी थियो । साउदीमा पनि महिलाहरूलाई सवारीसाधन लगाउन पाउने व्यवस्थालाई धेरैले एउटा महत्वपूर्ण घटनाको रूपमा लिएका छन् । साउदी अरेबियाका युवराज मोहम्मद बिन सलमानले यहाँका महिलाले सवारी चलाउन नपाउने कानुनलाई रुढीवादी संस्कार भन्दै आफ्नो मुलुकलाई पनि आधुनिकतातर्फ लान यस्तो कदम चालेको बताएका थिए ।
सवारीसाधन चलाउने अनुमति पाएसँगै राजधानी रियाद सहितका प्रमुख शहरमा महिलाहरूले बिहानैदेखि सवारीसाधन चलाउन थालेका छन् । ‘मलाई यो दिन आउँछ भन्ने पहिल्यै थाहा थियो तर सोचेभन्दा केही चाँडो आयो’, समर अल्मोग्रेनले भनन् ि।
यो व्यवस्थासँगै आकाशमा उड्ने चराजस्तै निकै ठूलो स्वतन्त्रताको महसुस गरेको उनको भनाइ छ । झण्डै ३० लाख महिलाले नयाँ स्वतन्त्रताको उपभोग गर्ने अपेक्षा गरिएको छ । यहाँ यसै महिनाको शुरुमा पहिलोपटक महिलाको नाममा चालक अनुमतिपत्र जारी गरिएको थियो । महिलालाई सवारी चलाउन दिने घोषणा भने गत वर्ष सेप्टेम्बर महिनामा नै गरिएको थियो । त्यसपछि यहाँका महिलालाई सवारी अनुमतिपत्रका लागि तालिम दिन शुरु गरिएको थियो ।
महिलाहरूले सवारीसाधन चलाउन पाउनुपर्ने मागसहित अधिकारवादीहरूले लामो समयदेखि साउदीमा अभियान चलाइरहेका थिए । अनुमति नभएको समयमा पनि महिलाले सवारी चलाएको भन्दै सन् १९९० मा साउदी अरेबियाको शहर रियादबाट दर्जनौँ महिला पक्राउ परेका थिए । साउदीको विद्यमान कानुनअनुसार यहाँ पुरुषले मात्र सवारी चालक अनुमतिपत्र पाउने गरेका थिए । सो कानुनमा संशोधन गरी युवराजले नै आदेश दिएपछि महिलाले यो अधिकार प्राप्त गरेका हुन् ।
नयाँ अधिकार पाएसँगै कैयौँ महिलाले सवारीसाधन चलाउने तालिम लिएका र चालक अनुमतिपत्र लिएका छन् । अमेरिकालगायत विश्वका देशहरूले महिलालाई पनि गाडी चलाउन दिने साउदी राजाको आदेशको स्वागत गरेका छन् । उनीहरूले राजाको यो कदमले साउदी अरेबियाका महिलाले केही मात्रामा भए पनि अधिकार प्राप्त गरेको विश्वका विभिन्न देशका महिला अधिकारकर्मी तथा संघसंस्थाहरूले जनाएका छन् ।
एएफपी
प्रतिक्रिया दिनुहोस !
