पोखरा : पोखरा लेखनाथ महानगरपालिकाको वडा नम्बर २१, ३१ र ३३ वडामा दुई वर्षभित्र स्थानीय नागरिकको घरघरका धारामा पानी पु¥याउने गरी खानेपानी आयोजनाको सम्झौता भएको छ ।
गाउँमा दुई वर्षभित्र हरेकको घरमा २४ सै घण्टा पानी आउने गरी खानेपानी आयोजनाको सम्झौता गर्न पाउँदा निकै खुसी लागेको पोखरा महानगरपालिका–२१ का वडाध्यक्ष खगराज आचार्यले सुनाए । वडाध्यक्ष आचार्यले यसै सहलगानीको खानेपानी आयोजनाको ठेक्का सम्झौता गर्दा त्यतिबेला रकम नपुगेपछि आफ्नो जग्गा धितो राखेर ४० लाख रकम जुटाएका थिए । स्थानीयले जुटाउनुपर्ने २० प्रतिशत रकममध्ये अहिले स्थानीयले २ करोड ६५ लाख जुटाइसकेका छन् । रकम जुटेपछि उनले त्यो रकम फिर्ता पाएका थिए ।
करिब २८ करोड बजेटका दुई आयोजनामध्ये भरतपोखरी कृस्ती निर्मलपोखरी सहलगानी खोनपानी तथा सरसफाइ आयोजनाक लागि १८ करोड ८८ लाख ४९ हजार १ सय ९३ र लेखनाथ दोस्रो सह लगानी खानेपानी आयोजनाका लागि ८ करोड १३ लाख ६२ हजार ६ सय २७ रुपैयाँ ठेक्का परेको हो । खानेपानी तथा ढल निकास विभागअन्तर्गत क्षेत्रीय अनुगमन तथा सुपरिवेक्षण कार्यालय पोखराका सिनियर डिभिजन इन्जिनियर नन्दलाल बञ्जाडे, तीन वटै वडाका वडाध्यक्ष, ठेकेदार र उपभोक्ता समितिका अध्यक्षबीच सह—लगानीको खानेपानी आयोजनाको चालु आर्थिक वर्षको ठेक्का रकम सम्झौता भएको हो ।
आयोजना सम्पन्न भएपछि खानेपानी अभावमा दुःख पाएका लेखनाथ खानेपानी तथा सरसफाइ आयोजनाअन्तर्गत साविक लेखनाथ नगरपालिका वडा नम्ब ९, १०, ११ का २ हजार ५ सय ३६ घरधुरी लाभान्वित हुने लेखनाथ खानेपानी तथा सरसफाइ आयोजनाका अध्यक्ष विष्णु बरालले बताए । लेखनाथको स्याङखुदीबाट पम्पगरी बेगनासडाँडामा निर्माण गरेको पानीट्यांकीमा खसालेर घरघरमा वितरण गरिनेछ । १५ वर्षको जनसंख्यालाई हेरेर आयोजना सञ्चालन गर्न लागिएको क्षेत्रीय अनुगमन तथा सुपरिवेक्षण कार्यालय पोखराका सिनियर डिभिजन इन्जिनियर नन्दलाल बञ्जाडेले बताए ।
आयोजनाअन्तर्गत भरतपोखरी कृस्ती निर्मलपोखरी सहलगानी खानेपानी तथा सरसफाइ आयोजनाबाट २ हजार १ सय ११ घरधुरीले २४ सै घण्टा प्रशोधन गरिएको पानी पाउने गरी आयोजना अघि बढेको वडा नम्बर २१ का वडाध्यक्ष खगराज आचार्यले बताए ।
प्रतिक्रिया दिनुहोस !
