जनकपुर : प्रदेश २ का मुख्यमन्त्री लालबाबु राउतले सबैभन्दा बढी जनसंख्याले बोल्ने भाषालाई सरकारी कामकाजमा ल्याइने बताएका छन् ।
भाषा आयोगले जनकपुरमा आयोजना गरेको कार्यक्रममा मुख्यमन्त्री राउतले मैथिलीलाई कामकाजको भाषा बनाउने संकेत गरेका हुन् । सरकारी तथ्यांकअनुसार प्रदेश २ मा सबैभन्दा बढी मैथिली भाषा बोलिन्छ । मातृभाषा प्रयोगले नै धेरै मुलुक विकासमा फड्को मारेको उल्लेख गर्दै उनले भने, ‘विश्वमा जहाँ–जहाँ मातृभाषालाई प्राथमकिता दिइएको छ, ती देश नै सबैभन्दा बढी विकसित भएका छन् । चीन, जापान यसका उदाहरण हुन् ।’
उनले प्रदेशमा बोलिने सबै मातृभाषाको सम्मान अहिलेको आवश्यकता रहेको धारणा व्यक्त गरे । मातृभाषालाई नै प्राथमिकता दिएर जाने हो भने प्रदेशको विकास अपेक्षाअनुसार हुने उनले बताए ।
‘त्यसमा पनि प्रदेशमा बोलिने बहुसंख्यक जनताको भाषालाई प्राथमिकता दिएर अघि बढ्नुपर्छ’, उनले भने, ‘सबैलाई सजिलो हुने भाषा बोल्नुपर्छ, प्रदेशमा सबैभन्दा बढी मैथिलीभाषी छन् । त्यसैले यसलाई कामकाजको भाषा बनाएर अगाडि जान सकिन्छ । यसरी गर्नु भनेको फेरि अन्य भाषालाई अपमान गर्नु भनेको होइन ।’ हिन्दीलाई पनि सम्पर्कको भाषा बनाएर जान सकिने अवस्था रहेको उनको भनाइ थियो ।
सामाजिक विकासमन्त्री नवलकिशोर साहले मैथिली भाषामा धेरै सुधारको आवश्यकता रहको औंल्याएका थिए । उनका अनुसार यसमा शब्द शुद्धीकरणको धेरै आवश्यकता छ । नेकपाका सांसद रामचन्द्र मण्डले मातृभाषाको प्रवद्र्धन जरुरी रहेको बताएका थिए ।
आयोगका अनुसार प्रदेश २ मा सबैभन्दा बढी मैथिली भाषा बोलिन्छ । दोस्रोमा भोजपुरी, तेस्रोमा बज्जिका र चौथोमा नेपाली बोलिने गरेको छ । आयोगको तथ्यांकअनुसार मैथली २४ लाखभन्दा बढीले बोल्छन् भने भोजपुरी १० लाखभन्दा बढीले बोल्ने गरेका छन् । त्यसैगरी, बज्जिका ७ लाख र नेपाली ३ लाखभन्दा बढीले बोल्ने गरेको तथ्यांक छ ।
प्रतिक्रिया दिनुहोस !
