जुम्ला: प्रहरीको निगरानीमा अनशन थालेका डा. गोविन्द केसीको पहिलो रात निकै कष्टकर भयो । प्रहरीघेराभित्रै अनसन शुरु गरेका डा. केसीलाई प्रहरीले आफ्नो नियन्त्रणमा रहने गरी जिल्ला खेलकुद विकास समितिको अव्यवस्थित कभर्डहलमा राखेको छ ।
बत्तीसमेत नरहेको कभर्ड हलमा उनको अनसनको पहिलो रात निकै कष्टकर बनेको डा. केसीका सहयोगीसमेत रहेका भाइ किशोर केसीले बताए । ‘डा. केसीलाई राखिएको कभर्डहल निकै अब्यवस्थित छ’, केसीले भने, ‘यहाँ कुनै सुविधा छैन, न त बिजुली छ । न त पानी र शौचालय, निकै कष्टका साथ अध्याँरोमै पहिलो रात बित्यो ।’
दियालोको सहायताले रात काट्न मुस्किल परेको उनले अन्नपूर्णसँग दुखेसो पोखे । अनसनस्थलमा विजुलीको व्यवस्था गरिदिन पनि उनले माग गरेका छन् ।
‘ठुलो कबर्डहलमा पानी चुहिन्छ, चिसो बढेको छ, कपडाको व्यवस्था पनि राम्रो छैन । डा. केसीलाई जाडोले समस्या बनाइरहेको छ’, उनले भने, ‘यस्तै अवस्था रहे केसीको स्वास्थ्यमा छिट्टै समस्या आउने देखिन्छ ।’ शनिबार दिउँसोबाट अनसन शुरु गरेका डा. केसीले अहिलेसम्म केही खाएका छैनन् ।
कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा अनशन बस्ने योजना बनाएर आएका डा. केसीलाई जुम्ला प्रशासनले निषेध गरेपछि जिल्ला खेलकुद विकास समितिको कबर्ड हलमा प्रहरीको नियन्त्रणमा राखिएको छ ।
डा. केसी अनशन बस्न लाग्दा शनिबार दिउँसो जिल्ला प्रशासन कार्यालय जुम्ला परिसरबाट प्रहरीले पक्राउ गरेको थियो । उनले पक्राउपछि हिरासतमै अनशन सुरु गर्दा प्रहरीले कबर्डहल लगेर छाडेको हो । चिकित्सा शिक्षा विधेयक मेडिकल माफियाको पक्षमा आएकाले सच्याउन माग गर्दै डा. केसीले जुम्लामा अनशन सुरु गरेका हुन् ।
प्रतिक्रिया दिनुहोस !
