काठमाडौं : गृह मन्त्रालयले इजरायलको नक्कली राहदानीमा काठमाडौं आएको एक इरानी दम्पतीलाई ५ वर्ष नेपाल आउन प्रतिबन्ध लगाएको छ । अध्यागमन विभागको सिफारिसमा गृहले इरानी दम्पती गेलारेह नाजारियानी र आयुव हेइदारीमाथि प्रतिबन्ध लगाएको हो ।
गृहको निर्णयसँगै अध्यागमन विभागले इरानी दम्पतीलाई बुधबार राति इरान फिर्ता पठाएको छ । नेपाल हुँदै इटाली जान इरानी दम्पतीले टर्कीको इस्तान्बुलका मानव तस्करको सहयोगमा नक्कली राहदानी किनेर काठमाडौं आएको बयान दिएका छन् । अध्यागमन विभागका मुद्दा शाखाका अधिकृत चिरञ्जीवी थापाले इरानी दम्पतीलाई ५ वर्ष नेपाल आउन नपाउने गरी गृहले निस्काशन गरेको जानकारी दिए ।
दुबई हुँदै जेठ १२ मा काठमाडौं आएका उनीहरू केही दिनको बसाइपछि उनीहरू भारतको नयाँ दिल्ली हुँदै इटाली गएका थिए । नयाँ दिल्लीस्थित अध्यागमन कार्यालयले राहदानी शंकास्पद भएको भन्दै उनीहरूलाई फिर्ता पठाएपछि त्रिभुवन विमानस्थलस्थित अध्यागमनले पक्राउ गरेको थियो ।
त्रिभुवन विमानस्थलस्थित अध्यागमन कर्मचारीले भने ती इरानी दम्पतीले प्रयोग गरेको इजरायलको नक्कली राहदानीमा आगमन र प्रस्थान अनुमति दिएका थिए । तेहरानबाट टर्की गएका उनीहरूले दुबई आउन्जेल इरानी राहदानी नै प्रयोग गरेको तर दुबईबाट काठमाडौं आउँदा इजरायलको नक्कली राहदानी प्रयोग गरेका थिए । काठमाडौं जिल्ला अदालतले जाली राहदानीअन्र्तगत उनीहरूलाई जनही २० हजार रुपैयाँ जरिवाना गरेको थियो ।
जाली राहदानी प्रयोग गर्ने ३ जना इरानीहरू अहिले पनि अध्यागमनको हिरासतमा रहेका छन । त्रिभुवन विमानस्थलस्थित अध्यागमनले मंगलबार अर्का एक इरानीलाई पनि इन्ट्री रिफ्युज गरेको थियो । उनीहरूका बारेमा थप अनुसन्धान भइरहेको अध्यागमन विभागले जनाएको छ ।
प्रतिक्रिया दिनुहोस !
