सिन्धुली : ठूला र साना गाडीको मापदण्डका विषयलाई लिएर एक महिनादेखि विवादमा परेको बीपी राजमार्र्गमा अवैध सामानको व्यापक ओसारपसार हुने गरेको समेत पाइएको छ ।
३३ किलो सुनकाण्डमा बीपी राजमार्ग प्रयोग गरिएको चर्चा नसेलाउँदै बीपी राजमार्गमा अवैध सामान ओसारपसार हुने गरेको विभिन्न प्रमाण फेला परेका हुन् ।
स्थानीय तथा प्रहरीले नै दिएको जानकारीअनुसार दैनिकजसो बीपी राजमार्ग हुँदै राजधानी काठमाडौं तथा पहाडी जिल्ला र काठमाडौं हुँदै मध्यतराईका साथै भारतसम्म अवैध सामान ओसारपसार हुने गरेको हो ।
चार दिनअघि मात्र ना.४ ख ५५१४ नम्बरको ट्रकभरि अवैध रूपमा गाईभैंसीको दाना तराईबाट लिएर बीपी राजमार्ग हुँदै काभ्रे जिल्लातर्फ निर्वाध प्रस्थान भयो । प्रहरीलाई विशेष सुराकी दिइए पनि प्रहरी प्रमुख रामेश्वर यादवकै निर्देशनमा प्रहरी चेकपोस्टमा बसेका प्रहरीले उक्त ट्रकलाई छाडेका हुन् ।
त्यसको एक दिनअघि मात्र ना.१ज ३९९२ नम्बरको बर्दिवास यातायातको बोलेरोमा करिब ३ लाख रुपैयाँ बराबरको भारतबाट राजस्व छली गरी काठमाडौंतर्फ लैजान ल्याउँदै गरेको अवैध कपडा जिल्ला प्रहरी कार्यालयनजिकै रहेको प्रहरी चेक प्वाइन्टमा नियन्त्रणमा लिए पनि छाडियो ।
त्यसको भोलिपल्टै ना.३ख २१९५ नम्बरको हायसमा झापाबाट काठमाडौंतर्फ लैजाँदै गरेको १ लाख ५० हजार रुपैयाँ बराबरको अवैध कपडा सुराकीकै आधारमा सिन्धुली प्रहरीले नियन्त्रणमा लिए पनि पुनः छाडियो । शुक्रबार मात्र बा.३ ख ७९७४ नम्बरको हायसमै महोत्तरीको बर्दिवासबाट लाखौं रुपैयाँको सुर्ती, रजनीगन्धा, पानपरागलगायत सामग्री सिन्धुली हुँदै बीपी राजमार्गबाटै काठमाडौं पठाइयो ।
यी त केही उदाहरण मात्र हुन् । जिल्लामा बीपी राजमार्गको प्रयोग गर्दै प्रहरीकै सेटिङमा अवैध मालसामान दैनिक रूपमा ओसारपसार हुने गरेको प्रमाण धेरै रहेको पाइन्छ ।
प्रहरीका उच्च अधिकारीहरूको सेटिङमा हुने यस्ता अवैध तस्करीले जिल्लामा साना पदमा रहेका प्रहरीलाई भने सास्ती पर्ने गरेको प्रहरी जवान बताउँछन् ।
‘हरेक सामग्री नेपाली र भारतीय सवारीसाधनमा दैनिक ओसारपसार भएको सुराकी आउँछ । हामी त्यसलाई नियन्त्रणमा लिन्छौं । तर, माथिल्लो तहका हाकिम साप’हरूको निर्देशनपछि पुनः छाडिने गरेका छन्,’ जिल्ला प्रहरी कार्यालय सिन्धुलीमा कार्यरत एक प्रहरी जवानले भने ।
‘तराईका व्यापारीसँगको मिलेमतोमा भारतबाट ल्याइएका अवैध सामान र पहाडका व्यापारीसँग मिलेर पहाडबाट गाई भंैसी, चीनबाट ल्याइएका लत्ताकपडा, विद्युतीय सामग्रीका साथै सुन, चाँदीसम्म बीपी राजमार्गबाट तराई हुँदै भारतसम्म पुर्याउने गरिएको छ । हामीले बोले जागिरै जान्छ । ठूलासँग कसरी सेटिङ हुन्छ थाहै हुँदैन,’ उनले थपे ।
उनका अनुसार सर्लाहीका कपडा व्यापारी दिनेश यादवले प्रहरीसँगको सेटिङमा दैनिक लाखौंका अवैध लत्ताकपडा काठमाडौं पुर्याउने गरेको खुलासासमेत भएको छ । गृहमन्त्री रामबहादुर थापाले हातहतियार तथा गुन्डागर्दीलाई निस्तेज पार्ने बताइरहे पनि अवैध हातहतियार प्रहरीकै सेटिङमा सिन्धुलीकै बीपी राजमार्गबाट राजधानी भित्रिने गरेको जिल्लावासीको अनुमान छ ।
बीपी राजमार्गमा झन्डै दुई वर्षदेखि रातको समयमा सवारी साधन सञ्चालनमा रोक लगाइएको छ । ‘तर, रातभर भारतीय नम्बर प्लेटका साना सवारी साधन निर्वाध सञ्चालन हुन्छन् । ती सवारीमा सुन, चाँदी, हातहतियार लागुऔषध जे भए पनि प्रहरीले कुनै चेकजाँच गर्दैन किन ? ’ उल्टो प्रश्न गर्छन्, नेकपाका जिल्ला नेता केशव देवकोटा ।
बिमारी बोकेका साना निजी गाडी, विवाहका रिजर्भ कार रोक्ने प्रहरीले किन त्यस्ता सवारीसाधन चेकजाँच हुँदैनन् ? उता, तराईबाट काठमाडौंसम्म पुर्याउने अवैध लागुऔषध तस्करी गर्ने नाका पनि बीपी राजमार्ग नै भएको प्रहरीले सार्वजनिक गर्ने गरेका विभिन्न घटनाको सार्वजनिकीकरणले प्रस्ट बनाइसकेको छ ।
उता, ३७ क्विन्टल सुन तस्करीका बेलासमेत सिन्धुलीकै बीपी राजगर्मा प्रयोग गरिएको भए पनि प्रहरीले नियन्त्रणमा लिन नसकेको भन्दै सिन्धुलीका तत्कालीन प्रहरी प्रमुखहरू विशेष निगरानीमा परेका छन् ।
सर्वोच्च अदालतले बीपी राजमार्गमा ३२ सिटसम्मका मझौला बस र १० टन क्षमतासम्मका ट्रक तथा टिपर सञ्चालन गर्न आदेश दिएको छ । तर, प्रहरीलाई ३ देखि १५ हजार रुपैयाँसम्म दिए राति निर्वाध छाड्ने नत्र रोक्ने गरेको भन्दै जिल्लाका व्यवसायी प्रहरीप्रति आक्रोशित छन् । बीपी राजमार्गका विवादबारे बुझ्न सिन्धुली आइपुगेका उपभोक्ता मञ्च नेपालका केन्द्रीय अध्यक्ष ज्योति बानियाँले बीपी राजमार्गमा अर्थराजनीति र नीतिगत भ्रष्टाचार बढ्दै गएको टिप्पणी गरे । सिन्धुलीका प्रमुख जिल्ला अधिकारी ज्ञानप्रसाद ढकालले बीपी राजगर्मामा हुने अवैध सामान ओसारपसारका विषयमा कडाइसाथ चेकजाँच गर्न प्रहरीलाई निर्देशन दिने बताए ।
प्रतिक्रिया दिनुहोस !
