सुर्खेतः जुम्लाको चन्दननाथ नगरपालिका ५ नम्बर वडाका वडाध्यक्ष अर्जन कठायत (गोल्डेन)ले एक कर्मचारीको कार्यकक्षमै पुगेर ज्यान मार्ने धम्की दिएका छन् । आफुले भनेको व्यक्तिलाई जागिर नदिएको भन्दै सोमबार सडक डिभिजन कार्यालय जुम्लाका प्रमुख माधव अधिकारीको कार्यकक्षमै पुगेका कठायतले अपशब्द बोल्दै जहाँ गएपनि नछोड्ने धम्की दिएका हुन् ।
पीडित अधिकारीले वडाध्यक्षले अपशब्ध प्रयोग गरी आमा गाली दिएको र परिआएमा ज्यान मार्नेसम्मको धम्की दिएको बताए । आफुले पारिवारिक विवाद सल्टाएर आउन पटक–पटक आग्रह गरेपनि आफुले भनेको व्यक्तिले जागिर पाउनुपर्ने अध्यक्ष कठायतले ढिपी गरेको अधिकारीको भनाइ छ ।
उनका अनुसार गतवर्ष साउन २२ गते कर्णाली राजमार्गको बिहानी खोलामा सडक डिभिजनको जेसीबी मेशिन दुर्घटना भएको थियो । दुर्घटनामा मेशिनका अपरेटर र सोही सडक खण्डमा कार्यरत लेन्थ वर्कर विष्णुबहादुर शाहीको घटना स्थलमै मृत्यु भएको थियो ।
‘शाहीको मृत्युपछि उनका छोराले सोही स्थानमा आफुला जागिर लगाइदिनको लागि पटक पटक कार्यालयमा आए’ अधिकारीले भने, ‘तर हामीले उनको परिवारका विषयमा बुझ्दा मृतक शाहीकी दुई श्रीमति, चार छोरा र तीन छोरी रहेछन्, मृतकको स्थानमा कसले काम गर्ने भन्ने विषयमा पारिवारिक सहमति गराउन आग्रह गरेका थियौं ।’
सोमबार मध्यान्ह १२ बजेतिर कलमले आफ्नो जागिरका लागि भनिदिन वडाध्यक्ष अर्जुन कठायत र साथमा एउटा अर्को युवकलाई ल्याएर सडक कार्यालयमा पुगे । कार्यालयमा पुगेका अध्यक्षले कलमलाई जागिर लगाउन अनुरोध गरेको तर आफुले पारिवारिक सहमति माग गरेपछि एक्कासी अपशब्दसहित गालीगलौजमा उत्रिएको प्रमुख अधिकारीको भनाइ छ ।
‘कलमका लागि साथमा आएका अर्का व्यक्तिलाई अध्यक्षले निवेदन लेख म बेहोरा भन्छु भन्नुभयो, तर विषय के लेख्यौं भनेर मलाई नै सोध्नुभयो’ अधिकारीले थपे, ‘मैले तपाइहरुको बेहोरा के हो त्यही लेख्नुहोस भने, त्यसपछि अध्यक्षले मलाई गालीबेइजत्ती गर्ने ज्यान मार्नेसहितको धम्की दिनुभयो । कार्यालयमा रहे कार्यालयमै, कालिकोट, मुगु जहाँ गएपनि त्यही गएर ठिक पार्छु, भन्दै दुईजना अरु केटाहरुलाई पनि बोलाउनुभयो, म डराएर स्टाफहरुलाई बोलाउन पुगेँ ।’
अधिकारीले समयमै वरीपरीका कर्मचारीहरु आफ्नो कार्यकक्षमा नछिरेको भए हातपात नै गर्ने वातावरण बनेको गुनासो गरे । उनले जीउधनको सुरक्षा माग गर्दै जिल्ला प्रशासन र प्रहरी कार्यालयमा निवेदन दर्ता गराएका छन् ।
कर्मचारीलाई सहयोग गर्नुपर्ने जनप्रतिनिधिले कार्यालयमा पसी धम्की दिनुले सुरक्षित भएर काम गर्न सकिने अवस्था नरहेको उनको गुनासो छ । यता वडाध्यक्ष कठायतले एक वर्षसम्म जनताको काम नगरेपनि हाकिमलाई सचेत गराउँदा सामान्य विवाद भएको बताए । उनले विवादमा भनाभन भएपनि आरोप लागेअनुसारको रेकर्ड देखाउन चुनौती दिए । ‘विवाद भएकै हो, ठिक पार्ने भए त कार्यालयमा नै ठिक पारिहाल्थे नी । उहाँले भनेजस्तो मैले धम्क्याएको रेकर्ड हुनुपर्यो, नत्र उहाँको भ्रम हुनसक्छ ।’
प्रतिक्रिया दिनुहोस !
