सिरहा : लक्ष्मीपुरपतारी गाउँपालिका–६ सीतापुरस्थित रामा महन्थी यादव जनता माविका निवर्तमान प्रधानाध्यापकले स्थानीय व्यापारीसँग १० लाख रुपैयाँभन्दा बढी ठगी गरेको आरोप लागेको छ ।
विद्यालयको जग्गामा व्यापारिक प्रयोजनका लागि बनाइएको सटर भाडामा दिने क्रममा पूर्वप्रधानाध्यापकले ठगी गरेको आरोप स्थानीय व्यापारीले लगाएका हुन् । आक्रोशित स्थानीय व्यापारीले विद्यालयको सटरमा तालाबन्दी गर्नुका साथै प्रहरीमा उजुरी दिएका छन् । विद्यालय भवनसँगै पश्चिमतर्फ बनाइएका १३ वटा सटरमा स्थानीय व्यापारीले तालाबन्दी गरेका हुन् ।
प्रधानाध्यापक कासेन्द्रप्रसाद यादव र सेवानिवृत्त प्रधानाध्यापक मोहम्मद सनाउल्ला खाँले सटर भाडामा दिने भन्दै नौ व्यापारीबाट १० लाख २० हजार रुपैयाँ उठाएर ठगी गरेको आरोप लागेको छ । तत्कालीन प्रधानाध्यापक खाँ नौ जनाबाट ७५ देखि २ लाख ४० हजार रुपैयाँसम्म उठाएर सटरै नदिई हिँडेको व्यापारी लहौटी साफीले बताए । खाँ फागुन १ गतेदेखि स्वेच्छिक अवकाशमा गएको शिक्षा विकास तथा समन्वय इकाइ सिरहाले जनाएको छ ।
व्यापारी शिवजी गुप्ताले फागुन २४ गते २ लाख र त्यसको केही दिनमा थप ४० हजार रुपैयाँ खाँलाई बुझाए पनि रसिद भने २ लाखको मात्र दिएको गुनासो गरे । सीतापुरका व्यापारी योगेन्द्र साहले खाँलाई माघ २५ गते १ लाख ५ हजार रुपैयाँ बुझाए पनि रसिद नपाएको सुनाए । खाँले १० लाख २० हजार रुपैयाँ उठाएको पीडितको दाबी छ । उनले मोहितनारायण साहसँग १ लाख, सुरेशकुमार गुप्ता, सुरैतलाल साह, प्रदीप पासवान, रामउदगार रामसँग ७५÷७५ हजार, लहौटी साफीसँग २ लाख रुपैयाँ उठाएको जनाइएको छ ।
उनले एक जनासँग पैसा लिएर बढीमा अर्कैलाई सटर दिएको पीडित व्यापारीले बताए । व्यापारी रामउद्गार रामका अनुसार खाँले पुनः जनही १ लाख रुपैयाँ लिएर गंगियादेवी राय, मोहम्मद साविर, मोहम्मद मजाहिर, रामदेव दास, शरणदेव ठाकुर, श्रीदेव यादव, धनिकलाल यादव, राजकुमार यादवलाई सटर भाडामा दिएका छन् । त्यस्तै, जनही २ लाख रुपैयाँ लिएर नथुनी साह, फियाज राइन, अमित गुप्ता, शिवचरण यादवलाई पनि सटर भाडामा दिएको पीडित व्यापारी बताउँछन् ।
रकम फिर्ता माग्दा ‘मलाई थाहा छैन’ भन्दै धम्क्याउने गरेकाले उनीसहित प्रधानाध्यापक कासेन्द्रप्रसाद यादव, विद्यालय व्यवस्थापन समितिका अध्यक्ष सुरुजनाथ यादवसहित सदस्यविरुद्ध इलाका प्रहरी कार्यालय लहानमा ठगीको उजुरी हालेको जनाइएको छ । खाँले भने विद्यालय व्यवस्थापन समितिको निर्णयअनुसार नै रकम संकलन गरिएको र आफूले विद्यालय छाड्ने बेला सबै बरबुझारथ गरिसकेको दाबी गरेका छन् ।
प्रतिक्रिया दिनुहोस !
