भोजपुर : कक्षा ९ मा अध्ययनरत भोजपुर नगरपालिका–७, डाँडागाउँकी प्रतिविम्ब राईले इन्जिनियर बन्ने लक्ष्यसहित ऐच्छिक विषयमा विज्ञान रोजिन् । तर, शैक्षिक सत्र सुरु भई दोस्रो त्रैमासिक परीक्षा हुन लाग्दा पनि उनको हातमा पुस्तक परेको छैन ।
‘चार महिना पुग्न लाग्दा पनि पुस्तकको अनुहार देख्न पाएको छैन’, उनले भनिन्, ‘परीक्षा आउन लागेको छ, कसरी तयारी गर्ने होला ? ’
उनका १५ जना साथीको पनि हालत उस्तै छ । स्थानीय विद्योदय माविमा ऐच्छिक विज्ञान विषय रोजेका विद्यार्थीले पुस्तक नपाउँदा पढाइमा बाधा पुगेको छ । पुस्तक नआएपछि विद्यालयले अनलाइनबाट पाठ्य सामग्री डाउनलोड गरी पठनपाठन गराइरहेको छ । विद्यालयले काठमाडौंमै पनि पुस्तक पाउन नसकिएको जनाएको छ । विषय शिक्षकलाई जनक शिक्षा सामग्री केन्द्र पठाउँदा पनि पुस्तक नपाइएको प्रधानाध्यापक कमलप्रसाद राईले बताए ।
कक्षा ११ र १२ मा विज्ञान विषय पढाइ हुने भएकाले यो शैक्षिक सत्रदेखि कक्षा ९ देखि नै यसलाई ऐच्छिकमा राखिएको विद्यालयले जनाएको छ । तर, पुस्तक अभाव भएपछि शिक्षक र विद्यार्थीलाई पढाइ अघि बढाउन समस्या भएको प्रधानाध्यापक राईले सुनाए ।
‘शैक्षिक सत्रको अगाडि नै अन्य पुस्तक पाइए पनि ऐच्छिक विज्ञान भने अझै पाउन सकिएको छैन’, उनले भने, ‘पुस्तक नपाइएपछि अहिले वेबसाइटका भरमा कक्षा सञ्चालन गर्नुपरिरहेको छ ।’
नयाँ शैक्षिक सत्रसँगै विज्ञान विषय अंग्रेजी संस्करणमा रहेको र अनलाइनमा नेपालीमा रहेकाले पढाउन समस्या भएको विषय शिक्षक हेमबहादुर राईले बताए । प्रत्येक पाठको पाठ्य सामग्री डाउनलोड गरेर पढाउनुपर्दा शिक्षक–विद्यार्थी दुवैलाई समस्या भएको सुनाउँदै उनले भने, ‘अहिले अनलाइनबाट डाउनलोड गरी फोटोकपी गरेका भरमा पढाउनुपर्ने बाध्यता छ ।’
जनक शिक्षा सामग्री केन्द्रमा जानकारी लिँदा भने पुस्तक छापिएर आइसकेको बताएको विद्यालयले जनाएको छ । ऐच्छिक विषय कति छाप्ने भनेर अन्योल भएका कारण केही ढिला भएको हुन सक्ने जनाइएको छ । विद्यालयका अनुसार केन्द्रले ऐच्छिक विज्ञान ५ हजार पुस्तक छापिएर तयारी अवस्थामा रहेको बताएको छ ।
विद्यालयमा ई–लर्निङ कक्षा प्रभावकारी बनेको छ । कम्प्युटर प्रविधिबाट पुस्तक, विषयगत पाठ्यक्रम र सन्दर्भसामग्री पढ्न र हेर्न पाइने व्यवस्था भएपछि विद्यार्थीलाई यस्तो कक्षा प्रभावकारी बन्दै गएको जनाइएको छ ।
इन्टरनेटका माध्यमबाट अन्तर्राष्ट्रियस्तरको शिक्षा दुर्गमका विद्यार्थीलाई दिने उद्देश्यका साथ ई–लर्निङ कक्षा सञ्चालनमा ल्याइएको शिक्षक खोमराज धमलाले बताए । विद्यार्थीलाई इन्टरनेटका माध्यमबाट ज्ञान आदानप्रदानका साथै संसारसँग जोड्न सिकाउने उनको भनाइ छ ।
ई–लर्निङ कक्षामा इन्टरनेटका माध्यमबाट सुविधासम्पन्न सहर र विदेशमा बस्ने नेपाली विज्ञबाट पठनपाठन गराउने तयारी विद्यालयले गरेको छ । एकै पटक ८० विद्यार्थीले विषयगत पाठ्य सामग्री र अन्य सन्दर्भसामग्रीलगायत विविध विषयमा अध्ययन गर्न सक्ने जनाइएको छ ।
प्रतिक्रिया दिनुहोस !
