म्याङलुङ : सवारी साधान चाप बढे पनि तेह्रथुममा व्यवस्थित बसपार्क बनेको छैन । जिल्ला सदरमुकाम म्याङलुङसहित बसन्तपुर, शुक्रबारे, जिरीखिम्ती, संक्रान्ति बजारलगायत व्यापारिक केन्द्रमा व्यवस्थित बसपार्क नहुँदा समस्या हुन थालेको जनाइएको छ ।
व्यवस्थित बसपार्क नहुँदा जथाभावी पार्किङ गर्दा सवारी साधन साधन सञ्चालनमा समस्या हुनुका लागि फोहोरमैला बढेको छ । बर्सेनि सवारी साधन बढ्दै गएपछि म्याङलुङको बस बिसौनी साँघुरिँदै गएको छ । जिल्लाका ६ वटै स्थानीय तहका केन्द्रसम्म यातायात सञ्चालन हुँदै आएको छ । तर, बसपार्कका लागि उचित स्थानमा जग्गा नहुनुका साथै यसमा कसैले पहल नगर्दा बस तथा सवारी साधन पार्किङमा समस्या रहेको शुक्रबारे बस काउन्टरका प्रमुख उदयदीप सम्बाहाम्फेले बताए ।
‘यात्रु र सवारी साधनको चाप बढेको छ तर बसपार्क व्यवस्थापन अनि निर्माणमा सरकारी निकायको ध्यान पुगेको छैन’, उनले भने । पहाडी क्षेत्रमा यातायात व्यवस्थापनका लागि बसपार्कको खाँचो रहेको उनको भनाइ छ ।
व्यवस्थापनमा ध्यान नदिइँदा बस बिसौनीमै पार्किङ गर्नुपर्ने बाध्यता रहेको जनाइएको छ । छथर शुुक्रबारे, बसन्तपुर, म्याङलुङ, मोराहाङ, औंसीडाँडा र संक्रान्ति बजारमा बसपार्क नहुँदा समस्या थपिँदै गएको आठराईका अमृत बाँस्तोलाले बताए ।
बस बिसौनी क्षेत्रभित्र पनि थोत्रा ट्र्याक्टर, मोटरसाइकलका साथै अन्य साधन अव्यवस्थित तवरले राखिँदा झनै समस्या भएको यातायात व्यवसायी डिल्ली रेग्मीको भनाइ छ । सदरमुकाम म्याङलुङ र सरकारले नमुना सहर बनाउने भनेको बसन्तपुर बजारमा पनि बसपार्क निर्माणका लागि पहल नगरिएको स्थानीयको भनाइ छ ।
बसपार्क अभावमा अव्यवस्थित रूपमा बस बिसौनीमा सबै सवारी साधन राख्नुको विकल्प नभएको म्याङलुङ ट्याक्सी काउन्टरका इन्चार्ज ओम लिम्बूले बताए ।
प्रतिक्रिया दिनुहोस !
