झापामा स्कुल बस र माइक्रो ठोक्किँदा पाँच विद्यार्थी घाइते
साउन १४, २०७५ सोमबार १५:७:०
दमक : झापाको कमल गाउँपालिका-५ स्थित पाडाजुंगीमा सोमबार बिहान माइक्रो बस र स्कुल बस जुध्दा पाँच विद्यार्थी घाइते भएका छन्। इलाका ट्राफिक प्रहरी कार्यालयका अनुसार बा ५ प ८२८ नं को पूर्वबाट पश्चिमतर्फ आइरहेको माइक्रो बसले को १ क २१५८ नं को हिमाली अंग्रेजी बोर्डिङ स्कुलको बसलाई बिहान स्थानीय पाडाजुंगी-गौरीगञ्ज सडकखण्डमा ठक्कर दिएको थियो।
यसरी घाइते हुनेमा दमक-१ का १४ वर्षीया सोनिया सुनाम, नौ वर्षीय आशिष सुनाम, दमक-६ का सात वर्षीय शिशिर धमला, दमक-८ का १० वर्षीय युजन सापकोटा र दमक-९ का ११ वर्षीय कृष्ण ताजपुरिया रहेको ट्राफिक प्रहरी नायब निरीक्षक विनोदकुमार खतिवडाले जानकारी दिए।
घाइतेमध्ये शिशिर र कृष्णको विराटनगरस्थित न्यूरो अस्पताल र अन्य घाइतेको लाइफलाइन अस्पताल दमकमा उपचार भइरहेको छ। दुर्घटनामा सलग्न दुबै सवारी अनुसन्धानका लागि प्रहरीले नियन्त्रणमा लिएको छ। रासस
प्रतिक्रिया दिनुहोस !
