भैरहवा : नेपाली कांग्रेस संसदीय दलको प्रमुख सेचतक एवं केन्द्रीय सदस्य बालकृष्ण खाँणले अहिले मुलुकमा प्रधानमन्त्री केपी ओलीको बोली र बन्दुकको गोली मात्र सस्तो रहेको बताएका छन् ।
ओली सरकारले मुलुकमा बढेको महंगीले जनतालाई जीवनकोपार्जन गर्न समस्या परेको उल्लखे गरे । ‘पेट्रोलियम पदार्थको मूल्य ५ पटक बढ्यो, खेती किसानीको बेला मलको मूल्य बढ्यो, खाद्यन्न त्यस्तै बढेको छ’, उनले भने, ‘अहिले सस्तो भनेको ओलीको बोली र गोली मात्रै हो ।’
प्रधानमन्त्री ओलीलाई इंगित गर्दै उनले अधिकार माग्ने जनतालाई गोली नचलाउन आग्रह गरे । ‘तपाईँले चलाएको गोली र बोलीले जनतालाई राहात दिनै सक्दैन, सच्चिनुस ।’
रुपन्देही कांग्रेसले भैरहवामा गरेको विरोध सभालाई सम्बोधन गर्दै उनले उत्तरको प्रधानमन्त्री आए उत्तरको साथमा रहेको भन्ने र दक्षिणको प्रधानमन्त्री आए दक्षिणको साथमा रहेको भन्ने लम्पसारवाद नीति लिएको आरोप लगाउँदै यसले मुलुक समृद्धितर्फ अघि बढ्न नसक्ने ठोकुवा गरे ।
मधेसको सिमानाको रक्षा केपी ओली नभई मधेसी जनताले गर्दै आएको बताउँदै नेता खाँणले ओलीलाई संविधानको धारा पालना गर्न आग्रह गरे । उनले ओलीको निरंकुशता रोक्नु पर्ने भन्दै संविधानमा सभामुख र उपसभामुख एउटै दलको बन्न नपाइने स्पष्ट व्यवस्था भए पनि ओली सरकार आखाँ चिम्लिएर बसेको बताए ।
प्रतिक्रिया दिनुहोस !
