प्यूठान : टिपर हिँड्ने वैकल्पिक सडक बिग्रिएपछि प्युठान नगरपालिका क्षेत्रका बजारबासी हैरानी खेप्न बाध्य छन् । तीव्र गतिमा गुड्ने टिपर र धुलोले सर्वसाधरणलाई समस्या पार्ने गरेको छ ।
बजारबाट टिपर नचलाउने गरी प्युठान नगरपालिकास्थित दाखाक्वाडीको बेलुवाबगरदेखि दम्तीसम्म झिमरुक नदी क्षेत्रमा वैकल्पिक सडक निर्माण गरिएको छ । तर, त्यसले दिगो समाधान दिन सकेन । तीन महिनामै नदी क्षेत्रमा सडक बिग्रिएपछि आजभोलि बजार क्षेत्रबाट टिपर गुड्ने गरेका छन् ।
दाखाक्वाडी, जुम्रिबजार, विजुवार, पूण्यखोला, बाग्दुला सडक क्षेत्रका स्थानीयलाई दैनिक कामकाज गर्न धेरै सकस पर्ने गरेको छ । ‘बजारबाट दिनहुँ टिपर गुड्दा धुलोले बस्नै नसक्ने हुन्छ’, बाग्दुला बजार व्यवस्थापन समितिका अध्यक्ष पदमबहादुर थापाले भने, ‘ट्राफिक जाम पनि उत्तिकै छ ।’ वैकल्पिक सडकलाई निरन्तर सञ्चालन गर्नेगरी समाधान खोज्न उनले सम्बन्धित निकायलाई आग्रह गरे । दैनिक ४०÷५० वटा टिपर ओहोरदोहोर गर्ने गरेका कारण बिजुवार र बाग्दुला बजार क्षेत्रमा दिउँसोको समयमा धेरै ट्राफिक जाम हुने गरेको छ । बाग्दुलादेखि चुनढुंगास्थल फोप्लीसम्मको बाटो फराकिलो भए पनि मुख्य बजार क्षेत्रको सडक साँघुरो छ ।
आर्थिक वर्ष ०७३/७४ मा सडक डिभिजन कार्यालय प्युठानले दाखाक्वाडीदेखि वैकिल्पक सडकको ट्र्याक खोलेको थियो । ‘क्वाडीदेखि दम्तीसम १० किलोमिटर दूरी छ’, डिभिजन प्रमुख सुरेश न्यौपानेले भने, ‘विस्तृत परियोजना प्रतिवेदन तयार गरेर सडक निर्माण भएको छ ।’ क्रमागत रूपमा सडक निर्माणका लागि बजेट नआएको उनले जानकारी दिए । १६ लाख रुपैयाँमा ट्र्याक खोलेको समेत उनले बताए ।
शुभ श्री अग्नि सिमेन्ट उद्योगले आफ्नै लगानीमा वैकल्पिक सडक निर्माण गरेको हो । करिब ६५ लाख रुपैयाँ लगानीमा बाटो निर्माण गरेको उद्योगका प्रबन्धक शिव अर्यालले जानकारी दिए । ‘वैकल्पिक सडक पनि राज्यले बनाउनुपर्ने हो’, उनले भने, ‘कात्तिकदेखि नियमित सञ्चालन हुने गरी बाटो बनाउछौँ ।’ बर्खा लागेसँगै खोलाले बाटो बिगारेको उनले सुनाए । झिमरुक नदीको दाखाक्वाडी झोलुंगेपुल र पाण्डेडाँडा क्षेत्रमा खोलाले बाटो बिगारेपछि टिपर गुड्न छाडेका छन् ।
बाटो बिग्रिएपछि बाध्यताले बजार क्षेत्रबाट टिपर हिँडिरहेको प्युठान नगरपालिका नगरप्रमुख अर्जुनकुमार कक्षपतिले जानकारी दिए । ‘रातको समय र बिहान १० देखि ११ बजेसम्म टिपर सञ्चालनमा रोक लगाएका छौँ’, उनले भने, ‘कार्यान्वयन भएको छैन ।’ झिमरुक नदी क्षेत्रबाट निरन्तर टिपर सञ्चालन हुनेगरी तटबन्ध निर्माण गरिने उनले बताए । चालु आवमा झिमरुक नदी तटबन्धमा विनियोजित ७५ लाख रुपैयाँ बजेटबाट टिपर गुड्न सडक क्षेत्रमा तटबन्धको काम गरिने उनको योजना छ । टिपर व्यवस्थापनलाई प्रभावकारी रूपमा कार्यान्वयन नगर्दा बजार क्षेत्रका नगरबासीले आक्रोस पोखेका छन् ।
प्रतिक्रिया दिनुहोस !
