भैरहवा : सरकारवादी (फौजदारी) मुद्दामा महत्वपूर्ण भूमिका रहने साक्षीलाई बकपत्रका लागि सम्मानका साथ अदालतमा उपस्थित गराइएको छ । जिल्ला सरकारी वकिल कार्यालय रूपन्देहीले चालु आव ०७५÷०७६ को पहिलो बकपत्रका लागि पाँच जना साक्षीलाई सम्मानका साथ अदालत उपस्थित गराएको हो । यससँगै ‘हेलो साक्षी’ अभियानको थालनीसमेत भएको छ ।
सरकारवादी बहुविवाह, मानव बेचबिखन, जबर्जस्ती करणी र लागुऔषधका ४ वटा मुद्दामा बकपत्रका लागि सम्मानका साथ साक्षीलाई उपस्थित गराई अभियानको थालनी गरिएको जिल्ला न्यायधिवक्ता कोषहरि निरौलाले बताए । सरकारी वकिल कार्यालय रूपन्देहीद्वारा भैरहवामा आयोजित कार्यक्रममा उनले सरकारवादी मुद्दामा साक्षीको भूमिका निकै महŒवपूर्ण हुने भएकाले उनीहरूलाई सम्मान गरेर अदालतमा उपस्थित गराइएको बताए । सरकारवादी मुद्दामा यसरी साक्षी अदालतमा उपस्थिति गराइएको यो पहिलो पटक हो । उनले मुद्दा फछ्र्योटका लागि साक्षीहरूको भूमिका महŒवपूर्ण हुने बताउँदै साक्षीहरूले सर्वसाधरणलाई यसबारे सकारात्मक जानकारी दिने बताए । सरकारवादी मुद्दालाई थप बलियो र प्रभावकारी बनाउने उद्देश्यले साक्षी अभियानको थालनी गरिएको न्यायाधिवक्ता निरौलाले बताए । खासगरी साक्षीको बयान प्रतिवादीले सजिलै थाहा पाउने हुँदा सुरक्षालाई ख्याल गरी साक्षीहरूले बकपत्र नदिने गर्छन् भने स्वयं व्यक्ति अदालतमा उपस्थिति भई बयान दिनुपर्नेजस्ता कारणले पनि साक्षीहरू खुलेर बयान दिन मान्दैनन् र उपस्थित पनि हुँदैनन् । आर्थिक अवस्था, टाढाबाट आउँदा झन्झटिलो हुनेजस्ता कारणले पनि साक्षी सहजै बकपत्र गर्न आउँदैनन् । सरकारवादी मुद्दाका साक्षीहरूलाई बकपत्रपश्चात् नेपाल सरकारको राजपत्र अनंकित प्रथम श्रेणीका कर्मचारीले पाउनेसरहको दैनिक भ्रमण भत्ता पाउने व्यवस्था रहेको छ । उक्त भत्ता प्रहरीले उपलब्ध गराउँदै आएको जिल्ला प्रहरी प्रमुख श्याम ज्ञवालीले बताए ।
जिल्ला अदालतका स्रेस्तेदार सञ्जीव पोखरेलले साक्षी नहुँदा प्रतिवादी पक्षले मुद्दा सार्ने गरेकोले पीडित झनै पीडामा पर्ने गरेको बताए । पोखरेलले प्रतिवादी पक्षले सरकार पक्षका साक्षीलाई प्रभावमा पार्दा साक्षी समयमा उपस्थित नहुने गरेको समस्या रहेको बताउँदै यसले कतिपय मुद्दा समयमा फछ्र्योट नहुने गरेको उल्लेख गरे ।
प्रतिक्रिया दिनुहोस !
