भैरहवा : भैरहवास्थित युनिभर्सल कलेज अफ मेडिकल साइसेन्स शिक्षण अस्पतालमा भएको घटनाको छानबिन हुने भएको छ । कलेजको बीडीएस चौथो वर्षमा अध्यनरत जनकपुरका २२ वर्षीय महादेव शाहको उपचारको क्रममा मृत्यु भएपछि कलेजका विद्यार्थीहरूले अस्पतालको अतिसंवेदनशील इकाइ आईसीयू, सीसीयूलगायत अन्य क्षेत्रमा तोडफोड गरेका थिए ।
घटनाको समाचार संकलनका लागि अस्पताल पुगेका पत्रकारहरूलाई विद्यार्थीहरूले एक्कासि आक्रमण गर्नुका साथै क्यामरा तोडफोड समेत गरेका थिए । उनीहरूले एपीवान टेलिभजन र इमेज टीभीको क्यामरा तोडफोड गरेका थिए । अन्नपूर्णकर्मीले खिचेको तस्बिरसमेत विद्यार्थीहरूले डिलिट गरेका थिए । पत्रकारमाथि आक्रमण र तोडफोडको विषयलाई गम्भीर रूपमा छानबिन समिति गठन गरी दोषीलाई कारवाही गर्न नेपाल पत्रकार महासंघ, नेपाल प्रेस यूनियन, लुम्बिनी प्रेस क्लबले जिल्ला प्रशसान कार्यालयमा ध्यानाकर्षणसहित ज्ञापनपत्र बुझाएका थिए ।
ज्ञापनपत्र बुझ्दै रूपन्देहीका प्रमुख जिल्ला अधिकरी उदयबहादुर रानाले घटनाको छानबिन गरी दोषीलाई कारवाही गरिने बताए । ‘समाचार संकलनका लागि अस्पतालमा गएका पत्रकारहरू माथि आक्रमण र क्यामरा तोडफोड गर्नु घटना निन्दनीय हो, उनले भने –‘यस्तो कार्य गर्ने दोषी विद्यार्थीलाई छानबिन गरी कारवाही गर्छौँ ।
रुपन्देहीका प्रहरी उपरीक्षक श्याम ज्ञवालीले पत्रकारमाथि आक्रमण र क्यामरा तोडफोड गर्नु विषयमा आफुहरूले गम्भिर रुपमा लिएको बताउँदै घटनाको छानबिन गरी दोषीलाई कारवाही गरी छाड्ने बताए ।
प्रशसानले घटनाको सत्यतथ्य छानबिनको लागि जिल्ला प्रशसान कार्यालय रुपन्देहीका प्रशासकिय अधिकृत विष्णुप्रसाद ज्ञवालीको संयोजकत्वमा ५ सदस्यीय छानबिन समिती गठन गरेको छ । जसको सदस्यमा नेपाल पत्रकार महासंघका उपाध्यक्ष दिनेश पाण्डे, लुम्बिनी प्रेस क्लबका अध्यक्ष माधव ढुंगाना, जिल्ला प्रहरी कार्यालयका प्रहरी निरीक्षक उमेश जोशी र मेडिकल कलेजको जनसम्पर्क अधिकृत सुशिल गुरुङ रहेका छन् ।
समितीलाई घटनाको छानबिन गरी एक हप्ता भित्र प्रतिवेदन बुझाउन निर्देशन दिइएको र प्रतिवेदनको आधारमा आवश्यक कारवाही अगाडी बढाइने प्रमुख जिल्ला अधिकारी रानाले बताए ।
यता अस्पताल प्रशसानले घटनाको छानबिनको लागि डा. मनोहर जोशीको संयोजकत्वमा ५ सदस्यीय छानबिन समिती गठन गरेको छ । मृतक परिवारले शव बुझेको अस्पतालले जनाएको छ । मृतक परिवारको तर्फबाट क्षतिपूर्ति माग भएपनि घटनाको छानबिन नहुदाँसम्म केही गर्न नसकिने अस्पतालका जनसम्पर्क अधिकृत सुशिल गुरुङले बताए ।
प्रतिक्रिया दिनुहोस !
