भैरहवा : मुलुक संघियतामा गएपछि पिछडिएको क्षेत्र पनि विकास हुने अपेक्षा गरिएको थियो । गाउँमा गाउँमा सिंहदरबार नारा दिएर निर्वाचनमा होमिएका राजनैतिक दलका नेता तथा कार्यकर्ता संघियता आएपछि भने एक आपसको विरोधमा उत्रिएका छन् ।
गाउँ–गाउँको विकास गर्ने भन्दै निर्वाचन जितेका रुपन्देहीका जनप्रतिनिधीहरु विवादमा पर्न थालेका छन् । जनप्रतिनिधीहरु एकले अर्कालाई भ्रष्टाचार गरेको आरोप लगाउँदै स्थानिय तहको विकासको काम छाडेर विनियोजित बजेटको पछाडी लाग्दा स्थानिय तहमा विवाद बढ्दै गएको हो ।
रुपन्देहीको सबैभन्दा पिछिडएको मानिने मर्चवार क्षेत्रमा स्थानिय तहका जनप्रतिनिधीहरु बीच विवाद बढ्दै जान थालेपछि मर्चवारको विकासमा स्थानिय चिन्ता व्यक्त गरेका छन् । मर्चवार क्षेत्रमा ३ वटा मर्चवारी गाउँपालिका, सम्मरीमाई गाउँपालिका र कोटहीमाई गाउँपालिका रहेका छन् । मर्चवारको विकासका लागि यी तीनवटै गाउँपालिका करोडौ बजेट विनियोजित भएपनि बजेटको सदुपयोग भन्दा दुरुपयोग हुदाँ स्थानिय रुष्ट हुनुका साथै जनप्रतिनिधीहरु बीच नै विवाद बढ्न थालेको छ ।
यसको पछिल्लो ज्वलन्त उदाहरण हो मर्चवारी गाउँपालिका । मर्चवारी गाउँपालिकाका जनप्रतिनिधीहरु विकासमा जुट्नुको सट्टा मुद्दा मामिला लिएर जिल्ला समन्वय समितीको कार्यालय रुपन्देहीमा धाउन थालेका छन् । गाउँपालिकाका अध्यक्ष, उपाध्यक्ष, २६ जना सदस्य एकातिर र ७ वटै वडाका वडाअध्यक्ष एकातिर हुदाँ विवाद उत्कर्षमा पुगेको हो ।
जनप्रतिनिधीहरुको विवादका कारण विकास निर्माणले गति लिन नसकेको स्थानियहरुले बताएका छन् । गाउँपालिकाले विनियोजन गरेको बजेटमा जनप्रतिनिधीहरु बीच भागबण्डा नमिल्दा उनीहरु एक पक्षले अर्को पक्षलाई भ्रष्टाचारको आरोप प्रत्यारोप लगाउँदै हिडेका छन् ।
विवादलाई लिएर जिल्ला समन्वय समिती रुपन्देहीको कार्यालयमा उपाध्यक्ष र सदस्यहरु सहित आएका गाउँपालिका अध्यक्ष केशवनन्द बनियाँले गाउँपालिकाको ७ वटै वडाअध्यक्षहरुले वडासदस्यहरुको राय सुझाव नलिई एकलौटी रुपमा काम गरिरहेको आरोप लगाए ।
वडाअध्यक्षहरुले आफ्नो वडासदस्यहरुलाई बाइकट गरी काम गरिरहेको भन्ने गुनासो आफुसगँ आएपछि मिलाउन खोजेको विवाद नमिलेपछि आफु समन्वय समिती प्रमुख समक्ष आएको अध्यक्ष बनियाँले बताए । उनले वडाअध्यक्षहरुले विकास निर्माण अनियमितता गर्ने गरेको आरोप लगाउँदै सदस्यहरुले हिसाब माग्दा समेत नदिने गरेको बताए ।
वडाअध्यक्षहरुले एकलौटी रुपमा काम गरेर भ्रष्टाचार गरिरहेको वडाका सदस्यहरुको आरोप छ ।
वडा नम्बर ६ का सदस्य रतनेश कुमार यादवले वडाअध्यक्षले गाउँपालिकाबाट आएको बजेट आफ्नै घरको जस्तै गरी खर्च गर्ने गरेको आरोप लगाए । निर्वाचनको बेला हामी पनि जनता समक्ष मत माग्न गएका थियौँ । वडाअध्यक्षले आएको बजेट व्यक्तिगत सरह प्रयोग गर्दा आज जनताले एउटा धारा माग्दा समेत दिन सक्ने स्थिती छैनौ, कसरी सदस्य भएर बस्ने ? उनले प्रश्न गरे ।
यता वडा नम्बर ४ का अध्यक्ष शैलेश श्रीवास्तवले गाउँपालिका अध्यक्षले वडाको योजना पनि आफै चलाउन खोजेको आरोप लगाए । उनले गाउँपालिका अध्यक्षले वडामा समेत ठाडो हस्तक्षेप गरी काम गर्ने गरेको आरोप लगाउँदै वडालाई दिने भनिएको एक करोड रुपैयाँ समेत कटौती गरी ८० लाख मात्र पठाउन खोजेको बताए । गाउँपालिका अध्यक्षले उपाध्यक्ष, वडाअध्यक्ष तथा सदस्यहरुलाई मिलाएर लैजानुपर्नेमा वडा सदस्यहरुलाई अनावश्यक रुपमा उचालेर विवाद सिर्जना गरेको उनको आरोप छ ।
प्रतिक्रिया दिनुहोस !
