नेपालगन्ज : अख्तियार दुरुपयोग अनुसन्धान आयोगको टोलीले सिक्टा सिँचाइ आयोजनाको पश्चिमी नहरको गुणस्तरबारे छानबिन सुरु गरेको छ । काठमाडौंबाट आइतबार र सोमबार दुई दिनमा अख्तियार टोली नेपालगन्ज पुगेको हो । टोलीले सोमबारदेखि मात्र काम सुरु गरेको हो ।
आयोगको शुक्रबार बसेको बैठकले आयोगका प्राविधिक सहसचिवको नेतृत्वमा पाँच सदस्यीय अनुसन्धान समूह गठन गरी विस्तृत अध्ययन गर्ने निर्णय गरेको हो । अख्तियारका सहसचिवएवं प्रवक्ता रामेश्वर दंगालले प्राविधिक सहसचिवको नेतृत्वको टोलीले स्थलगत रुपमा अनुसन्धान थालेको पुष्टि गरे । उनले भने, ‘उच्चस्तरको टोली स्थलगत अध्ययनका लागि पुगेको छ । कसरी काम भइरहेको छ भन्नेबारे कुनै अपडेट छैन ।’
अन्य छानबिन आयोग जस्तो निश्चित समय सीमा तोकेर, निश्चित कार्य विधि र अख्तियार पाएर अनुसन्धान नगर्ने भएकाले अधिकार सम्पन्न अनुसन्धान टोलीले अख्तियारको प्रचलित अनुसन्धान विधिमा काम गरिरहेको प्रवक्ता दंगालले प्रष्ट पारे । अख्तियार टोलीले स्थलगत रुपमा कम्तीमा पनि दुई दिन रहने बताइएको छ ।
सिक्टा सिँचाइ आयोजनाका जिम्मेवार अधिकारी र ठेकेदार कम्पनीका व्यक्तिसँग सोधपुछ गर्ने र आवश्यक ठानेमा सिक्टा सिँचाइबाट प्रभावित स्थानीय र सो क्षेत्रका जनप्रतिनिधिसँग पनि अख्तियारले जानकारी लिने बताइएको छ । अख्तियारले यसअघि भइरहेको अनुसन्धान कार्यलाई समेत एकीकृत गरी विस्तृत अनुसन्धानको कार्यलाई तीब्रता दिने जनाएको छ ।
यसअघि गरेको अनुसन्धानको अवस्था भने अझैं सार्वजनिक भएको छैन । न त अख्तियारले सो घटनामा संलग्नलाई कारबाहीको प्रक्रिया नै अघि बढाएको छ । सिक्टा सिँचाइ आयोजनाको ४४ दशमलव २५ किमी लामो पश्चिमी मुल नहरको परुवा खोलादेखि डुडुवा खोलासम्मको १४ किलोमिटर क्षेत्रमा सयौं ठाउँमा प्वाल परेको छ ।
नहर परीक्षणका क्रममा दुई पटक भत्किएको थियो । जीर्ण भएका कारण नहर जुनसुकै बेला भत्किने खतरा रहेको राप्ती सोनारी गाउँपालिका–९ का वडा सदस्य पूर्णबहादुर वलीले चिन्ता ब्यक्त गरे ।
प्रतिक्रिया दिनुहोस !
