अस्पताललार्इ १२ लाख बुझाएर चिन्ताजनक अवस्थामा घर लगियो बिरामी
साउन ३०, २०७५ बुधबार ११:३:०
भद्रपुर : उपचार खर्चबापत ११ लाख ८७ हजार रुपैयाँ तिरेपछि झापाको बिर्तामोडस्थित बीएन्डसी अस्पतालले बिरामीलाई घर लैजान दिएको छ । मोटरसाइकल दुर्घटनामा गम्भीर घाइते भई उपचाररत इलामको रोङ गाउँपालिका–४ का ३३ वर्षीय अरुण तामाङलाई मंगलबार उनका आफन्तले घर लगेका हुन् । उपचारको १० लाख र औषधिबापतको १ लाख ८७ हजार रुपैयाँ बुझाए पनि अस्पतालले पूर्ण उपचारबिनै चिन्ताजनक अवस्थामा घर पठाएको जनाइएको छ ।
अस्पतालले सोमबार उपचार खर्चबापत १६ लाखको हिसाब दिएपछि उनका आफन्त आत्तिएका थिए । उनीहरूले मंगलबार जसोतसो पैसाको बन्दोबस्त गरेपछि अस्पतालले अरू १५–२० दिन उपचार गराउँदा सुधार हुन सक्ने बताएको थियो । तर, दैनिकजसो १ लाख रुपैयाँ अस्पताललाई बुझाउन सक्ने हैसियत नभएकाले नाजुक अवस्थामै घर फिर्ता गर्नुपरेको घाइतेका भाइ उमेशले बताए ।
झापाबाट इलाम जाने क्रममा यही साउन १३ गते इलामको बर्नेमा दुईवटा मोटरसाइकल दुर्घटना हुँदा अरुण घाइते भएका थिए । उनलाई सोही दिन बीएन्डसी अस्पतालमा भर्ना गरिएको थियोे । अस्पतालले १६ दिनपछि ‘पैसा अब छिटो तिर्नू नत्र उपचार हुँदैन’ भनेपछि बिरामी नराख्ने सोच बनाएको उमेशले सुनाए ।
उनका अनुसार अस्पतालका कार्यकारी निर्देशक दुर्गाप्रसाद प्रसाईंसहित चिकित्सकसित मंगलबार छलफल हुँदा उपचार खर्चमा सहमति भएको हो । पैसा तिर्ने उपाय नभएको र बिरामीको स्वास्थ्य अवस्थामा पनि सुधार नभएकाले अस्पतालबाट लैजान बाध्य हुनुपरेको गुनासो उनले गरे ।
प्रतिक्रिया दिनुहोस !
