विराटनगर : व्यवसायिक घरनाका रुपमा परिचित काबरा गु्रपले क्वालिटी नुडल्समार्फत एकसाथ चाउचाउका दुई नयाँ उत्पादनलाई बजारमा ल्याएको छ ।
विस्कुटमा छुट्टै ब्राण्ड स्थापित भएपछि चाउचाउमा हात हालेको काबरा गु्रपले शनिबार राति विराटनगरमा एक कार्यक्रम गरेर ७० करोड रुपैयाँ लगानीमा चाउचाउका दुई नयाँ उत्पादन सुरु गरिएको जानकारी दिएको हो ।
ग्रुपले ‘रोमियो’ र ‘ज्याकपट’ नाम गरेका दुईवटा नयाँ चाउचाउ बजारमा ल्याएको हो । योसँगै काबरा गु्रपले उत्पादनले गर्ने चाउचाउको ब्रान्ड तीन पुगेको छ । यसअघि यो ग्रुपले ‘निकनक’ चाउचाउ उत्पादन गर्दै आएको थियो ।
‘रोमियो’ ७० ग्राम र ‘ज्याकपट’ ५५ ग्रामको प्याकमा रहने क्वालिटी नुडल्सका सञ्चालक श्याम काबराले बताए । उपभोक्तालाई आकर्षित गर्न ‘रोमियो’ को प्याकेट भित्र क्वालिटी गु्रपकै उत्पादन ‘कान्छा चोकोकिड्स’ र ‘ज्याकपट’ चाउचाउको प्याकेट भित्र एउटा ठूलो चकलेट राखिएको उनको भनाइ छ ।
काबराका अनुसार दुवै चाउचाउको एक प्याकेटको खरिद मूल्य १५ रुपैयाँ छ । उनले चिकेन र भेज दुवै चाउचाउ उत्पादन हुने जानकारी पनि दिए ।
क्वालिटी नुडल्समार्फत नयाँ चाउचाउ उत्पादनको शुभारम्भ काबरा गु्रपका संरक्षक गणपतलाल काबराले गरे । मोरङको बुढीगंगा गाउँपालिका हात्तीमुडास्थित उद्योगबाट दैनिक १६ घण्टा मेशिन चलाएर २० हजार कार्टुन चाउचाउ उत्पादन गर्न थालिएको जनाइएको छ ।
काबरा गु्रपले ३३ वर्ष अघि विस्कुट उद्योगबाट व्यवसाय सुरु गरेको हो । गु्रपले अहिले टेस्टी टेस्टी, बनबन, थिन आरारोट, गाई छाप ग्लुकोज, मर्निङ टच, डाईजेस्टिभ जस्ता विस्कुट उत्पादन गर्दै आएको छ । चकलेट र स्न्याक्स समेत बजारमा ल्याइएको गु्रपले जनाएको छ ।
‘चाउचाउका नयाँ उत्पादन लिएर हामी बजारमा आएका छौं,’ सञ्चालक सिद्धार्थ काबराले भने, ‘बजार र उपभोक्ताको रुचि तथा मागलाई ध्यानमा राखेर उत्पादन बढाउँदै लैजाने योजना छ ।’
उनले काबरा गु्रपका सबै उत्पादन उपभोक्तामुखी हुने गरेको दाबी गर्दै गुणस्तर कायम गर्न सकेकैले उपभोक्तामाझ स्थापित भइरहेको बताए । आगामी दिनमा पनि गुणस्तरमा थप सुधार गरेर उत्पादनलाई निरन्तरता दिइने उनको भनाइ छ ।
प्रतिक्रिया दिनुहोस !
