बुटवल : उपचार खचै तिर्न नसक्दा नवलपरासीका एक युवक नौ महिना अस्पतालमै बस्नु परेको छ । मोटरसाइकल दुर्घटनामा परेपछि ०७४ जेठ १४ गते बुटवलको जेनस अस्पताल भर्ना भएका नवलपरासी भर्तापुर–१, मिठ्ठाका २२ वर्षिया सुरज विक अस्पतालमै बसेका हुन् ।
उपचारमा लागेको करिव १२ लाख रुपैयाँ तिर्न नसकेपछि उनी ०७४ मंसिरमा डिस्चार्ज भए पनि अस्पतालमै बसे । आफन्तको मोटरसाइकल चलाउँदा उनको दायाँ खुट्टा भाचिएको अस्पतालले जनाएको छ । स्थानीय सामुदायिक अस्पतालमा उपचार नभएपछि एम्बुलेन्सबाट उनलाई जेनस ल्याइएको थियो ।
पैसा तिर्न नसकेपछि डिस्चार्ज भएको ९ महिनादेखि अस्पतालको वार्डमै बसिरहेको उनले बताए । ‘एक लाख अस्पतालमा बुझाएका छौं, १२ लाख जति बिल आएको छ, विकले अन्नपूर्ण पोष्टसंग भने,–‘पैसा नभएपछि यही बसेको छु ।’ बृद्ध भइसकेका उनका बाबु स–सानो मजदुरी गर्छन । एक कठ्ठा जमिन मात्रै भएकाले जग्गा बेचेर उपचार पनि असम्भव भयो । बाबु भगौती बिकले भएको सम्पत्ती दृष्टिबन्धक राखी एक लाख ऋण निकालेर अस्पताललाई बुझाएका हुन ।
‘जग्गा बेच्छु भनेर मान्छे खोजे कसैले किनेनन्, आँसु पुछ्दै उनले भने–‘पैसा नभएपछि अस्पतालमै छोरालाई राख्नु परेको छ ।’ उनको एक कठ्ठा जमिनको मुल्य करिव तीन लाख छ । अस्पतालमा उठेको पैसाको एक तिहाई पनि जमिन बेचेर आउदैन । गाउको कुनामा भएकाले सम्पत्ती किन्ने समेत निस्किएनन् । दुर्घटना अघि सुरज लेवर काम गर्दै आएका थिए । उनकै कमाईले घरको गुजारामा सहयोग पुगेको थियो । दाजु पनि मिस्त्री हुन । उनले पनि त्यती धेरै पैसा जम्मा गर्न नसक्ने भएपछि सम्पर्क बाहिरै बसे । बाबुले कहिले काही खाना बोकेर सुरजलाई भेट्न अस्पताल आउथे ।
‘बुटवल आउनका लागि बस भाडा पनि नभएपछि खाना ल्याउन सक्नुभएन, सुरजले भने,–‘यही अस्पतालमा उपचार गर्न आउने बिरामीले खाना दिएर बाचेको छु ।’ उनको बेड छेउमा पोकोमा चिउरा र एउटा गिलास छ । पछिल्लो चार महिनादेखि उनलाई अस्पतालले वास्ता गरेको छैन । बेड खाली भए बेडमा नभए भुईमै सुत्नु परेको छ । दाया खुट्टामा छड राखेर टेक्न मिल्ने भएको छ । राम्रोसंग हिड्न भने मिल्दैन् ।
अस्पतालले शुल्क नतिरी बिरामीलाई छाड्न नमिल्ने बताएको छ । अस्पतालकी सञ्चालक डा. शारदा सिंहले धेरै जना बिरामी आउने भएकाले सबैलाई फ्रि गर्न नसकिने बताइन् । ‘सुरजको सात÷आठ पटकसम्म अप्रेसन गर्नुपर्ने केश थियो, उपचारमा कमी गरेका छैनौ, उनले भनिन्–‘तर लागेको पैसा नलिइ कसरी छाड्नु ।’
यो अवधीमा सुरजको सवा दुई लाखको औषधिमा मात्रै खर्च भएको छ । अस्पतालकै आग्रहमा उनले नजिकैको क्यान्टिनबाट डेढ लाखको खाना खाएका छन् । पछिल्लो समय भने उनलाई क्यान्टिनले खाना दिन छाडेको थियो ।
अस्पतालले उनको शुल्कमा २५ प्रतिशत मिनाहा गर्न सकिने बताएको छ । त्यति घटाउदा पनि परिवारले रकम जुटाउन नसक्ने भएपछि शुक्रबार प्रशासनको रोहबरमा सहयोग रकम संकलन गरी घर पठाउन अस्पताल सहमत भएको छ ।
विकको परिवारले रकम तिर्न नसकेपछि नवलपरासीको प्रहरी चौकीमा सहयोगको आग्रह सहित निवेदन दिएको थियो । सञ्चार माध्यममा समेत खवर आएपछि उनलाई अस्पतालबाट घर लैजाने सहमति भएको हो । इलााका प्रहरी कार्यालय बुटवलका प्रमुख डिलबहादुर मल्लले संघसंस्थाबाट सहयोग जुटाई पुस महिनासम्म तिर्ने गरी विरामीलाई घर पठाउने सहमति भएको बताए । ‘उसको जायजेथा बिक्री गर्दा पनि उपचारको खर्च नपुग्ने भएपछि सहयोगको आह्वान गरिएको छ, उनले भने–‘जतिसक्दो कम शुल्क बनाएर तिर्नमा अस्पताल सहमत भएको छ ।’ उनले सहयोग गरिदिन समेत आग्रह गरे ।
...
अस्पतालको बेडमा सुरज विक । अन्नपूर्ण
प्रतिक्रिया दिनुहोस !
