बेलबारी : मोरङ फुटबल एकेडेमी दोस्रो अन्तर्राष्ट्रिय आमन्त्रण डाँगीहाट गोल्डकप फुटबल प्रतियोगिताको सेमिफाइनलमा प्रवेश गरेको छ । मोरङको बेलबारी नगरपालिका-११ स्थित लक्ष्मीमार्गको खेलमैदानमा सोमबार भएको खेलमा विदेशी पाहुना टोली भारतको युनाइटेड खर्साङ फुटबल क्लबलाई ५-० को फराकिलो गोल अन्तरले स्तब्ध बनाउँदै मोरङले अन्तिम चारमा स्थान सुरक्षित गरेको हो । वर्षाका कारण हिलाम्य बनेको मैदानमा पाहुना टोली खर्साङले सन्तोषजनक खेल पस्कन नसकेको फाइदा राष्ट्रिय र विदेशी खेलाडीसहित मैदानमा आएको मोरङले लियो ।
एकपक्षीय खेलमा मोरङको सनसनीपूर्ण जितका लागि कप्तान सन्तोष न्यौपानेले तीन गोल गर्दै ह्याट्रिक पूरा गरे । मोरङका तर्फबाट कर्ण लिम्बू र शौजन राईले एक÷एक गोल गरे । प्रतियोगिताको म्यान अफ दी म्याच घोषित न्यौपानेले खेलको १६औं मिनेटमै गोलको खाता खोलेर मोरङलाई अग्रता दिलाएका थिए । एक्लै अघि बढेका उनले विपक्षी गोलरक्षक निगम सिंहलाई बिट गर्दै बललाई पोस्टको दिशा दिँदा खर्साङ दबाबमा पर्यो । त्यसको तीन मिनेटमै मोरङले अग्रता दोब्बर बनाउँदा खर्साङ सम्हालिन सकेन । १९औं मिनेटमा विपक्षी खेलाडीले क्लियर गर्न नसकेको बललाई कर्ण लिम्बूले नियन्त्रणमा लिएर पोस्टको दर्शन गराउँदा मोरङ २-० गोल अन्तरले अघि बढ्यो ।
खर्साङका विरेन प्रधानले डिबक्सभित्र मोरङका शौजन राईलाई फल गरेपछि ७०औं मिनेटमा रेफ्री मदन काफ्ले मोरङलाई पेनाल्टी सुटआउटको अवसर दिन चुकेनन् । सन्तोषले गरेको पेनाल्टी प्रहार विपक्षी गोलरक्षक निगम सिंहलाई ठोक्किएर रिवान्ड भए पनि पुनः उनैले त्यसलाई पोस्टको दिशा दिन सक्दा खेल ३-० अन्तरमा पुग्यो । ७३औं मिनेटमा मोरङले खेललाई ४-० को अन्तरमा पुर्यायो । वान टु वान पासको मद्दतबाट बललाई जाली चुमाउँदै सन्तोषले ह्याट्रिक पूरा गर्दा खर्साङको हार निश्चितजस्तै बन्यो । खेलको इन्जुरी समयमा गोल थपेर खर्साङमाथि ५-० अन्तरको फराकिलो जित आफ्नो टिमलाई दिलाउन शौजन राई सफल भए ।
खेलको दोस्रो मिनेटमै कर्ण लिम्बूले विपक्षी गोलरक्षकलाई बिट गर्दै गरेको प्रहारलाई खर्साङका खेलाडीले क्लियर गरेर आफ्नो टिमको सुरुआती संकट टारेका थिए । ३२औं मिनेटमै विपक्षी गोलरक्षक निगम सिंह अगाडि बढेको मौकामा उनैले गरेको प्रहारलाई पनि खर्साङका विरेन प्रधानले क्लियर गरिदिए । ३७औं मिनेटमा गोलरक्षक सिंह अगाडि बढेको मौकामा पनि कर्ण खाली पोस्टमा गोल गर्नबाट चुके । गोलरक्षक अगाडि बढेको अवस्थामा ५७औं मिनेटमा पनि उनको प्रहारमा विपक्षी खेलाडी विरेन बाधक बने । ६६औं मिनेटमा मोरङका शौजन राईको प्रहार क्रस बारमा लागेर फर्कियो ।
मोरङका सामु फितलो प्रदर्शन गरेर निरीह बनेको खर्साङले २५औं मिनेटमा गोल फर्काउने अवसरलाई सदुपयोग गर्न सकेन । निवार रानाको प्रहारमा मोरङका गोलरक्षक किशोर गिरी बाधक बने । २९औं मिनेटमा खर्साङका राजीव प्रधानको प्रहारले पनि विपक्षी बार भत्काउन सकेन । ३९औं मिनेटमा रोहन राई वान भर्सेस वानमा चुक्दा पहिलो हाफमा खर्साङले गोल फर्काउन सकेन । मध्यान्तरपछि ६०औं मिनेटमा राजीव प्रधानको प्रहारलाई मोरङका गोलरक्षक गिरीले उत्कृष्ट ढंगबाट बचाउ गरेर आफ्नो टिमका विरुद्ध गोल हुनबाट जोगाए । ८०औं मिनेटमा आदर्श तामाङ चुक्दा खर्साङले खेलमा सान्त्वना गोल पनि फर्काउने अवसर पनि गुमायो । मंगलबारको खेलमा रेडहर्ष क्लब इलाम र अन्डर १८ राष्ट्रिय टिमबीच प्रतिस्पर्धा हुने आयोजक डाँगीहाट युथ क्लबका अध्यक्ष विक्रम राईले बताए ।
प्रतिक्रिया दिनुहोस !
