काठमाडौं : गृह मन्त्रालयले लुकिछिपी गुम्बामा बसेर शंकास्पद गतिविधि गर्ने एक तिब्बतीलाई पक्राउ गरी भारत पठाएको छ । मुस्ताङको एउटा गुम्बामा बस्दै आएका तिब्बती पेमा गेलेलले स्वतन्त्र तिब्बतका पक्षमा गतिविधि गरेको आशंकामा पक्राउ गरी गृहले भारत पठाएको हो ।
छानबिनका क्रममा विभागले उनको साथबाट राहदानीलगायत कागजपत्र समेत भेटेन । विभागले उनलाई फेरि नेपाल पस्न नपाउने सचेतसमेत गराएको छ । अध्यागमन विभाग मुद्दा शाखाका अधिकृत चिरन्जीवी थापाले सामान्य जरिवाना गरी पेमालाई भारत पठाइएको बताए । पेमा पहिलो पटक सन् २००८ मा चिनियाँ राहदानीमा काठमाडौं आएका थिए । सधैं गेरु वस्त्रमा हुने उनी केही समय काठमाडौं बसेपछि भारत गएका थिए ।
गृहले लामो समयदेखि गैरकानुनी रूपमा नेपाल बस्दै आएका पेमामा चीनविरोधी गतिविधिमा संलग्न रहेको आशंका गरेको छ । भारतबाट आउँदा पेमा केही समय फर्पिङको एउटा गुम्बामा बसेका थिए । पछिल्लो समय उनी लामो समयदेखि मुस्ताङमा बस्दै आएका थिए । पेमा मुस्ताङका गुम्बामा बसेको थाहा पाएपछि उनी शंकास्पद गतिविधिमा संलग्न भएको हुन सक्ने भन्दै जिल्ला प्रशासन मुस्ताङले निगरानी गरेको थियो । पेमाले भारतको पेनुर रिम्पोचे गुम्बामा बुद्ध दर्शनको अध्ययन गरेका थिए ।
चिनियाँ राहदानी नभए पनि उनी खुला सिमानाको फाइदा उठाउँदै अवैध ढंगले बारम्बार भारत—नेपाल आउजाउ गर्दै आएका थिए । अध्ययन सकेपछि आफू भारतका विभिन्न गुम्बामा बसेको उनले बताएका छन् । विभागले केही समयअघि चीनविरोधी गतिविधिमा संलग्न रहेको आरोपमा चिनियाँ सुरक्षा अधिकारीले पक्राउ गरी नेपाल प्रहरीलाई बुझाएका तिब्बती नागरिक तासीलाई समेत भारत नै पठाएको थियो ।
प्रतिक्रिया दिनुहोस !
