दसैंअघि दाङमा नियमित हवाई उडान
तुलसीपुर : २०११ सालमा स्थापना भएको दाङको टरिगाउँ एयरपोर्टमा पुनः नियमित हवाई सेवाको तयारी गरिएको छ । पटक पटक बन्द हुँदै र सञ्चालन हुँदै आएको टरिगाउँ एयरपोर्टमा दसैं अघिबाट हवाई सेवालाई नियमित गर्न लागिएको संस्कृति, पर्यटन तथा नागरिक उड्यानमन्त्री रविन्द्र अधिकारीले बताएका हुन् ।
आफू मन्त्री भएदेखि दाङको हवाई सेवा नियमित गर्ने सोच बनाएको र यो दसैं अघि नै हवाई सेवा नियमित हुने उनले बताए । एयरपोर्ट निरीक्षणका लागि दाङ आएका मन्त्री अधिकारीलाई तुलसीपुर उपमहानगरपालिकाले एयरपोर्टमै गरेको स्वागत गरेको थियो ।
‘दाङमा नियमित हवाई सेवा सञ्चालन गर्ने योजना बनिसकेको छ, हवाइसेवा सञ्चालनका धेरै विकल्प छन्’, सोही अवसरमा उनले भने, ‘सबै विकल्पलाई केलाएर सजिलो, सस्तो र भरपर्दाे विकल्पमा हामी पुगेका छौं ।’ उनले पहिलो चरणमा नियमित गर्न काठमाडौ–भैरहवा–दाङ गरेर सेवा सुरु हुने जानकारी दिए ।
‘हवाई सेवा नियमित गर्न कुराभन्दा काम गरौं भनेर लागेका थियौं’, अधिकारीले भने, ‘ठूला जहाज चलाउन रनवे सानो भयो, साना जहाज चलाउन इन्धन आवश्यक हुने देखियो । अहिले यसलाई पूरा गर्न भैरहवा टेकअफ गरेर दाङमा नियमित गर्न सकिन्छ ।’
यो सेवा दसैं अघिबाटै सुरु हुने उनले दाबी गरे । साना जहाज कम भएका कारण धेरै एयरपोर्टमा नियमित गर्न नसकेको उनले बताए । पछिल्लो समय धेरै वर्षदेखि हवाई सेवा अनियमित भएका स्थानमा पनि नियमित गराउन सुरु गरेको उनको भनाइ छ ।
उपमहानगरपालिकाका मेयर घनश्याम पाण्डेले इतिहास बोकेको एरपोर्टलाई तत्काल नियमित बनाउन आग्रह गरे । उनले दाङमा हवाई सेवा जोड्न स्थानीय सरकारले पहल थालिरहेको समेत जानकारी दिए ।
नेपाल वायु सेवा निगमका महानिर्देशक सञ्जीव गौतमले दाङमा हवाई सेवा नियमित गर्न कहीँ कतै अवरोध नहुने बताए । उनले हवाई सेवालाई नियमित गर्न निगम तयार भएको जानकारी दिए ।