प्यूठान : अमृत जीवन माध्यमिक विद्यालय नारीकोटका छात्राहरुमा रुने, कराउने समस्या समाधान नभएपछि मनोवैज्ञानिक शिविर संचालन गरिने भएको छ । जिल्लाको दुर्गम क्षेत्रमा पर्ने गौमुखी गाउँपालिका–७ पिपलरुखा स्थित उक्त विद्यालयका १२ जना छात्राहरुमा अझै यस्तो समस्या देखिएको छ ।
आइतबार विद्यालयमा प्रमुख जिल्ला अधिकारीसहित जनप्रतिनिधि, व्यवस्थापन समिति, शिक्षक, अभिभावकहरुको अन्तरक्रियाले छिट्टै परामर्श शिविर संचालन गर्ने निर्णय गरेको हो । ‘यसअघि पनि एक दिनसम्म विद्यार्थीलाई परामर्श गरिएको रहेछ’,स्थलगत पुगेका प्रमुख जिल्ला अधिकारी बद्रीनाथ गैह्रेले भने,‘चार÷पाँच दिनसम्म परामर्श गर्नुपर्ने देखियो ।’ उनका अनुसार विद्यार्थी र अभिभावकलाई नै राखेर परामर्श गरिने छ । शिविर संचालनका लागि लाग्ने खर्च गाउँपालिकाले व्यवस्थापन गर्ने निर्णय भएको विद्यालयले जनाएको छ ।
‘असार ५ गतेदेखिको समस्या अझै सुल्झिएन’,प्रधानाध्यापक रामचन्द्र गिरीले भने,‘धेरैपटक पुँजापाठ ग¥यौँ । केही गरेपनि समाधान हुन सकेन् ।’ सुुरुमा ४७ जना विद्यार्थीमा यस्तो समस्या देखिएको थियो । जसमध्ये अधिकांश छात्रा छन् । छात्राहरु भूइँमा लडीबुडी गर्ने, छटपटिने र चिच्चाउने गर्छन् । फाट्टफुट्ट देखिएको समस्या विस्तारै धेरै विद्यार्थीमा सरेको हो । उनीहरु घरमा पनि त्यस्तै गर्ने गरेको अभिभावकहरुले बताएका छन् ।
महिनौदेखिको समस्या अझै नसुल्झिएपछि दैनिक पठनपाठन प्रभावित हुने गरेको शिक्षिका विष्णा रोकाले गुनासो गरिन् । ‘राम्रोसँग पढाउने वातावरण बन्न सकेको छैन्’,उनी भन्छिन्,‘निको होला भन्दै तीन महिना बितिसक्यो ।’ यसअघि गाउँमा पुगेको जिल्लाको स्वास्थ्यकर्मीको टोलीले विद्यार्थीहरुमा ‘कनभर्सन डिसअडर’ भएको बताएका थिए ।
सामूहिक रुपमा विद्यार्थीलाई परामर्श दिँदा समस्या अझ बढ्नसक्ने भएकाले अलग÷अलग राखेर परामर्श गर्नुपर्ने स्वास्थ्यकर्मीहरुको सुझाव छ । विद्यालयले विद्यार्थीलाई सम्हाल्न नसकेपछि अभिभावकहरुलाई विद्यालयमै बोलाउने गरिएको छ । अधिकांश ६ देखि १६ वर्ष उमेर समूहका बालबालिकामा यस्तो समस्या छ ।
प्रतिक्रिया दिनुहोस !
