काठमाडौं : हिमालसँग मानव सम्बन्ध जोडिएको ६५ बर्से इतिहासमा जम्मा ४ सय ८ जना महिलाले सर्वोच्च शिखर सगरमाथाको सफल आरोहण गरेका छन् । पर्यटन विभागको तथ्यांकअनुसार २०३२ साल जेठ २ मा जापानी महिला जुन्को तावेईले पहिलो पटक सगरमाथाको आरोहण गरेयता यस वर्षसम्म सगरमाथा शिखर टेक्ने महिलाको संख्या हो यो ।
यस वर्ष जम्मा ५२ जना महिला सगरमाथा शिखरमा उक्लिएका थिए । तीमध्ये १७ जना नेपाली छन् । २०५० वैशाख १० गते नेपाली महिला पासाङ ल्हामु शेर्पाले पहिलो पटक सफल आरोहण गरेकी थिइन् । गत वर्षसम्म २६ र यस वर्ष १७ जना गरी ४३ जना नेपाली महिलाले सगरमाथाको सफल आरोहण गरिसकेका छन् ।
सगरमाथा आरोहण गर्ने नेपाली महिलामध्ये संखुवासभा घर भई हाल अमेरिकी नागरिकता लिएकी लाक्पा शेर्पाले सर्वाधिक ९ पल्ट आरोहण गरी विश्व कीर्तिमान बनाएकी छन् । उनले २०५७ जेठ ५ गते पहिलो पटक नेपाली मोहोडाबाट सगरमाथा आरोहण गरेकी उनले निरन्तर ८ पटक तिब्बती मोहोडाबाट आरोहण गरेकी छन् । नेपाली मोहोडाबाट उनले एक पटक मात्र आरोहण गरे पनि माया शेर्पा, सुश्मिता मास्के र छुरिम शेर्पाले दुई पटक आरोहण गरेका छन् । यस वर्ष १५ जना महिला सगरमाथा आरोहणमा असफल भएर फर्किएको पर्यटन विभागले जनायो ।
साहसिक क्षेत्रमा नेपाली महिला पनि सक्षम रहेको पछिल्लो समय पर्वतारोहणलगायत कठिन काममा बढ्दो महिला उपस्थितिले देखाएको पर्यटन विभागका महानिर्देशक डण्डुराज घिमिरेले बताए । पर्वतारोहणसँगै, स्कि, कायाकिङ, ¥याफ्टिङ, माउन्टेन बाइक, बाइकरेस, रक क्लाइम्बिङ, वाल क्लाइम्बिङजस्ता साहसिक खेलमा महिलाको सहभागिता बढिरहेको छ ।
सगरमाथा मात्र नभएर नेपाली महिला आरोहीले सातै महादेशका अग्ला सात हिमशिखर समेत आरोहण गरिसकेका छन् । विश्वका अग्ला १४ हिमाल आरोहण गर्न समेत आरोही माया शेर्पाले अभियान सुरु गरिसकेकी छन् । यस्तै दोलखा रोल्वालिङकी दावा याङजुम शेर्पा एसियाकै पहिलो माउन्टेन गाइड बनेकी छन् ।
प्रतिक्रिया दिनुहोस !
