बिर्तामोड : मनसा थाई फुड्स प्रालिले झापामा ‘मगमग’ चाउचाउ उद्योग सञ्चालनमा ल्याएको छ । मेचीनगर १४ स्थित दुवागढीमा एक अर्ब रुपैयाँ लगानीमा अत्याधुनिक प्रविधि र अत्याधुनिक मेसिनको प्रयोग गर्दै उद्योग सञ्चालनमा ल्याइएको हो ।
बिर्तामोडमा मंगलबार पत्रकार सम्मेलन गरी आफ्नो उत्पादनको मगमग चाउचाउ सार्वजनिक गरेको छ । मनसाले क्षमताको हिसाबले यो उद्योगमा प्रयोग गरिएको नुडल्स प्लान्ट नेपालकै सबैभन्दा ठूलो प्लान्ट रहेको प्रालिका म्यानेजर रमेश प्याकुरेले जानकारी दिए । यो मेसिनले दैनिक सात लाख ५० हजार प्याकेट चाउचाउ उत्पादन गर्ने उनको भनाइ छ ।
उद्योग हाल आंशिक रूपमा सञ्चालनमा रहेको र पूर्णरूपमा सञ्चालनमा आए यस उद्योगमा दैनिक दुई सय ५० देखि तीन सय जना कामदारले प्रत्यक्ष रोजगारी पाउने बताइएको छ । यो कम्पनीले उत्पादन गरेको चाउचाउ नेपालका सातवटै प्रदेशसहित छिमेकी राष्ट्र भारतमा समेत पुर्याउने लक्ष्य रहेको बताइएको छ ।
भविष्यमा अमेरिका र अस्ट्रेलियामा समेत आफ्ना उत्पादन पुर्याउने लक्ष्यका साथ गुणस्तरीयता र मानव स्वास्थ्यलाई ख्यालमा राखी उत्पादनन सुरु गरेको म्यानेजर प्याकुरेलको भनाइ छ । यो उद्योगले मगमग चाउचाउसहित प्यारी, रेलिमाई र गट्टुबट्टुलगायत स्न्याक्स र चीजबल, चिजरिङ, कुटुकुट लगायतका खाद्य वस्तु उत्पादन गर्नेछ । कम्पनीका सबै उत्पादन मंगलबारदेखि बजारमा आएका छन् ।
प्रतिक्रिया दिनुहोस !
