बिर्तामोड : चार लेन बन्न लागेको बिर्तामोड–भद्रपुर सडक खण्डको निर्माण कार्य सुरु भएको छ । २७ करोड रुपैयाँ लागतको सडक निर्माणका लागि डिभिजन सडक कार्यालय दमकले टेन्डर आह्वान गरेको थियो । उक्त सडक निर्माणका लागि भौतिक पूर्वाधार तथा यातायात मन्त्रालयले बजेट विनियोजन गरेको डिभिजन कार्यालयका इन्जिनियर माधव पौडेलले जानकारी दिएका छन् । उनले भने, ‘काम सुरु भएको १८ महिनाभित्र पूरा गरिसक्ने लक्ष्य छ ।’ सडक निर्माणको शुभारम्भ प्रदेश सांसद एकराज कार्की, बिर्तामोड नगरपालिका प्रमुख ध्रुवकुमार शिवाकोटी र उपप्रमुख मञ्जु महतरा प्रसाईंले संयुक्त रूपमा डोजर चलाएर गरेका छन् ।
बिर्तामोड–भद्रपुर सडकखण्डको अधिकांश भाग भत्किएको भए पनि पहिलो चरणमा भने बिर्तामोडको मुक्ति चोकदेखि चार किलोमिटर सडक मात्रै बन्न लागेकोे हो । चार किमिमध्ये २.८ किलोमिटर सडक १६ मिटर चौडा, एक मिटर नाली र फुटपाथसहित जम्मा २३ मिटर चौडा हुनेछ । यो चार लेनको बन्ने छ । बाँकी सडक सात मिटर चौडाको दुई लेनको बन्नेछ । पाँच सेन्टिमिटरसम्म आस्फाल कंक्रिट प्रयोग गरी सडक निर्माण हुने बताइएको छ ।
पहिलो चरणमा ठेकेदार कम्पनीले सडक निर्माणमा अवरोध गर्ने विद्युत् पोल हटाउन प्राधिकरणलाई १५ लाख रुपैयाँ बजेट दिएको र पोल हटेपछि निर्माणको काम सुरु हुने इन्जिनियर पौडेलले बताए । ‘हामीले यो सडकलाई नगरभित्रको स्मार्ट सिटीको अवधारणअन्तर्गत चार लेनको बनाउन लागेका हौं’, बिर्तामोड नगरप्रमुख शिवाकोटीले भने, ‘बिर्तामोडदेखि चार किमिसम्मको सडकखण्ड अति व्यस्त र धेरै भत्किएकाले बनाउनैपर्ने भएको छ, त्यसैले प्राथमिकता यसले पायो ।’
निर्माण सम्पन्न भएपछि बिर्तामोड मुक्तिचोकदेखि भद्रपुर बस स्ट्यान्डसम्मको सडकको बीच भागमा बोरिएर राखिनेछ । सडकको अन्य खण्डमा भने पेन्टिङ गरिने डिभिजन सडक कार्यालय दमकले जनाएको छ । मुक्तिचोकदेखि मेची आँखा अस्पतालसम्मको सडकखण्डको अधिकांश भाग भत्किएको छ ।
उक्त सडक सदरमुकाम भद्रपुर तथा जिल्लाको दक्षिणपूर्वी गाउँपालिकाहरू कचनकवल, हल्दिबारीलाई पूर्वपश्चिम राजमार्गसँग जोड्ने मुख्य सडक हो । सडक खाल्डाखुल्डी र ढल निकासको व्यवस्था नहुँदा प्रत्येक बर्खामा बिर्ताबजार क्षेत्र डुबानमा पर्ने गरेको छ ।
जिल्लाको प्रमुख व्यापारिक केन्द्र बिर्तामोडदेखि सदरमुकाम भद्रपुरसम्मको सडकखण्ड भत्किएको वर्षाैं बिते पनि बन्न सकेको थिएन । एसियाली विकास बैंक (एडीबी) को सहयोगमा तीन वर्षअघि नै उक्त सडक निर्माणको ठेक्का लागेको थियो । तर ठेकेदार कम्पनी थोदुङ–लोहनी–सिंह एन्ड ब्रदर्श जेभीले सम्झौताबमोजिम काम नगरेपछि सडक निर्माण थप अन्योल बनेको थियो ।
प्रतिक्रिया दिनुहोस !
