ललितपुर : कांग्रेस ललितपुर कार्यालय भवन रहेको जग्गाको स्वामित्व विवादले अहिले चर्काे रुप लिएको छ । जिल्ला तहका नेताहरू कांग्रेस कार्यालय भवन रहेको सोही जग्गाका विषयमा व्यक्तिगत गाली गलौजसम्ममा उत्रेका छन् । ललितपुर कांग्रेस नखिपोटमा रहेको आठ आना जग्गामा छ ।
उक्त जग्गा ओमकारप्रसाद श्रेष्ठको नाममा छ । जग्गा पार्टीको नाममा गराइपाऊँ भन्दै जिल्ला सपभाति मदनबहादुर अमात्यले पाटन जिल्ला अदालतमा मुद्दा नै हालेका छन् । हाल मुद्दा विचाराधीन अवस्थामा छ ।
जिल्लामा पार्टी अफिस नहुँदा कुलाल महर्जनले सो जग्गा उपलब्ध गराएको श्रेष्ठको भनाइ छ । जग्गा दाता महर्जनले आफ्नो नाममा जग्गा पास गर्ने भए मात्रै दान दिने भनेकाले श्रेष्ठको आफ्नो नाममा जग्गा नामसारी गरेको दाबी गरेका छन् । ०५५ सालतिर महर्जनबाट सो जग्गा नामसारी गराउँदा आफूले ८६ हजार रुपैयाँ तिरेको श्रेष्ठले बताए । आफ्नो नाममा जग्गा नामसारी भएपछि मात्रै पार्टी कार्यालय स्थापना गरिएको श्रेष्ठको भनाइ छ ।
‘हाल जग्गा मेरै नाममा छ । कार्यालयचाहिँ पार्टीको नाममा छ । जग्गाको विषयमा अपवाह फैलाएर जिल्ला सभापति अमात्यले बेइज्जत गरे’, श्रेष्ठले भने । पार्टी कार्यालय रहेको जग्गा विवादको विषय नरहेको उनको भनाइ छ । अमात्यलाई विश्वास गर्न नसक्दा नै उनको कार्यकालभर जग्गा पास नहुने तर्क श्रेष्ठले गरे । ‘अमात्यले जग्गा बेचेर अन्तै सर्न खोजेका छन्’, उनले भने । उक्त भवन निर्माणको शिलान्यास स्व.सन्त नेता कृष्णप्रसाद भट्टराईले गरेकाले उक्त भवनमा धेरैको भावना मिसिएको श्रेष्ठको तर्क छ ।
मंसिरको चुनावमा अन्तर्घात गरेको आरोप लगाउँदै अमात्य पक्षले श्रेष्ठलगायत २७ जनाविरुद्ध कारबाही मागसमेत गरेका थिए । ‘चुनावमा हारको झोकमा मविरुद्ध लागेका हुन्’, श्रेष्ठले भने ।
तर पार्टी सभापति अमात्यले भने आफ्नै कार्यकालमा जग्गा पार्टीको नाममा नामसारी गराइछाड्ने दाबी गरे । ‘त्यसैले म अदालतसम्म पुग्नुपरेको हो । अदालतको फैसला कुरिरहेको छु’, अमात्यले भने । जग्गा पार्टीको नाममा नामसारी गराउन तीन महिनाअघि पाटन जिल्ला अदालतमा मुद्दा हालेको उनले जानकारी दिए ।
सम्पत्ति शुद्धीकरण अनुसन्धान विभाग र अख्तियारले पनि फाइल झिकाएको उनको भनाइ छ । ‘मालपोतका हाकिमले जग्गा पास गराउन पटकपटक आग्रह गर्दा तीन दिनसम्म झुलाए’, अमात्यले भने, ‘ श्रेष्ठले जग्गा नामसारी गर्न चाहेका छैनन् । पार्टीको सम्पत्ति हडप्न खोजेका छन् ।’
आफ्नै पहलमा ललितपुरको माल्टा, भट्टेडाँडा, भारदेउ र कालेश्वरमा दुईदुई लाख रुपैयाँका दरले पार्टी कार्यालय स्थापना गर्न जग्गा किनेको अमात्यले जानकारी दिए ।श्रेष्ठले दुःख दिएको र उनीसँग मिल्न नसक्ने भएकाले नै कानुनी लडाइँबाटै टुंगोमा पुग्न खोजेको उनले बताए । ‘चुनावमा करोडौं खर्च गरेर श्रेष्ठले मलाई हराउने खेलमा लागे’, अमात्यले भने, ‘मुद्दा छिनोफानो नभइन्जेल पार्टी कार्यालयमै जान्नँ ।’
तर श्रेष्ठ भने आफू झगडा गर्ने पक्षमा नरहेको बताउँछन् । जग्गा नबेच्ने सर्तमा मात्रै नामसारी हुन सक्ने उनको भनाइ छ । सबै कार्यकर्तालाई मिलाएर लैजानुपर्ने उनको माग छ ।
कार्यालयको बिजोग
आठ आना जग्गामा ठडिएको तीन तले भवनमा रङरोगन गरिएको छैन । टाँस्दै, निकाल्दै गरेका सूचनाले भित्ता फोहोर देखिएका छन् । नेपाल तरुण दल, नेपाल विद्यार्थी संघ, नेपाल दलित संघलगायत खुइलिएका होर्डिङ बोर्डका कारण पाटी कार्यालय कुरुप बनेको छ । वरिपरि घाँस उम्रिएको छ । प्रायः कार्यालय सुनसान रहन्छ । कार्यालयको भुइँतलामा रेखदेखका लागि एक जना व्यक्ति मात्र बसेका छन् ।
प्रतिक्रिया दिनुहोस !
