दमक : झापाको सुरुङ्गामा भएको प्रथम टिभिएस टी– ट्वान्टीको उपाधि युथ एकाडेमी राजविराजले उचालेको छ । शुक्रबारको फाइनल खेलका विराटनगरको क्रिकेट क्लवलाई २ विकेटले पराजित गर्दै राजबिराजले उपाधि उचालेको हो ।
उपाधिसँगै राजविराजले नगद ५१ हजार रुपैयाँ प्राप्त गरेको छ । उपविजेता बिराटनगरले ३१ हजार प्राप्त गर्यो । टस हारेर ब्याटिङ लाईनमा उत्रिएको विराटनगरले निर्धारित ओभरमा आफ्नो ९ विकेटको क्षतिमा १ सय ३२ रनको मध्यम स्तरको स्कोर बनाएको थियो । विराटनगरका तर्फबाट राष्ट्रिय टीमका सदस्यसमेत रहेका सिद्धान्त लोहनीले सर्वाधिक ३३ रन जोडेका थिए ।
यस्तै अमर राउटेलाले २५ रन जोड्दा अन्य खेलाडीले सम्झन लायक प्रर्दशन गरेका थिएनन् । राजविराजका तर्फबाट फिरदोज अन्सारीले ३ र दिवासु मल्लिकले २ विकेट लिएका थिए । राजविराजले आफ्नो १३३ रनको विजयी लक्ष्य ८ विकेटको क्षतिमा अन्तिम ३ वल बाँकी छँदै हासिल गरेको थियो ।
राजविराजका लागि अन्तिम ओभरमा १२ रनको आवश्यकता रहेको बेला ओभरको दोस्रो र तेस्रो बलमा लगातार छक्का प्रहार गर्दै राजविराजले जित सुनिश्चित गरेको थियो ।
राजविराजका लागि ब्याटस्म्यान राष्ट्रिय खेलाडी मेहबुब आलम चल्न नसके पनि अन्य ब्याट्सम्यानले खुलेर ब्याटिङ्ग गरेका थिए । प्रतियोगितामा राजविराजका लागि हासिम अन्सारीले ३९ रन र विवेक यादवले २४ रनको योगदान दिए ।
विराटनगरका बलर अजय राजवंशी र मन्दिप श्रेष्ठले समान २÷२ विकेट लिए पनि विराटनगरको हारलाई टार्न सकेनन् । प्रतियोगिताको फाइनल खेलको म्यान अफ द म्याच विराटनगरका हासिम अन्सारी घोषित भए । यसवापत उनले नगद २ हजार प्राप्त गरे ।
प्रतियोगिताकै उत्कृष्ट खेलाडी राजविराजका महबुब आलम घोषित भए । उनले नगद ५ हजार प्राप्त गरे । प्रतियोगितामा सर्वोकृष्ट विकेट किप्पर भैरहवाका प्रज्जल थापा, सर्वोकृष्ट बलर आयोजक ह्वाइट वास क्रिकेट क्लवका दिपेश कँडेल, सर्वोत्कृष्ट ब्याट्सम्यान राजविराजका अमृत यादव घोषित भए । सबैले नगद ५ हजार तथा ट्रफी प्राप्त गरे ।
कनकाई सचेत युवा क्लव र ह्वाइटवास क्रिकेट क्लवको संयुुक्त आयोजनामा भएको प्रतियोगितामा नेपालका ८ टीमको सहभागिता थियो । प्रतियोगितालाई कनकाई नगरपालिकाको सहायता थियो । प्रतियोगिता कनकाई माविको खेल मैदानमा असोज ६ गतेदेखि संचालन भएको थियो।
प्रतिक्रिया दिनुहोस !
