तौलिहवा : कपिलवस्तुको चारनम्बरमा शुक्रबार राति सवारी दुर्घटना हुँदा एक युवकको ज्यान गएको छ । अर्का एक युवक घाइते भएका छन् । पश्चिमबाट पूर्व आउँदै गरेको लु ३७ प ९२५० नं. को मोटरसाईकललाई विपरित दिशाबाट आइरहेको लु १ ख ६७९२ नं को ट्रकले ठक्कर दिँदा मोटरसाइलमा सवार दुई जना गम्भीर घाइते भएका थिए।
घाइते दुवै जनालाई कपिलवस्तुमा उपचार सम्भव नभएपछि बुटबल पठाइएको थियो । घाइते मध्येरुपन्देही कन्चन गाउँपालिका रुद्रपुरका निश्चल थापाको उपचारका क्रममा मृत्यु भएको प्रहरीले जानकारी दिएको छ।
अर्का रुपन्देही सैनामैना नगरपालिका सालझण्डीका मोहन थापालाई थप उपचारको लागि काठमाण्डौ पठाइएको प्रहरीले जनाएको छ । उनीहरु दुवै जना रुपन्देहीको नवप्रभात माध्यमिक विद्यालय सालझण्डीमा कक्षा १० मा अध्ययरत थिए । ठक्कर दिने ट्रक र चालक प्रहरी नियन्त्रणमा रहेको इलाका प्रहरी कार्यालय पिपराका प्रहरी निरीक्षक चन्द्र बहादुर केसीले जानकारी दिए।
यसअघि पनि सोही ठाउँमा पटक पटक सवारी दुघर्टना भएको स्थानीयले बताएका छन् । रातको समयमा सडकको दुवै पट्टी ट्रक र टिप्पर लस्कर लगाएर रोकेर राख्दा सवारी दुर्घटना बेढेको स्थानीयको भनाइ छ ।
प्रतिक्रिया दिनुहोस !
