हेटौंडा : हेटौंडा उपमहानगरपालिकाले लक्ष्यभन्दा १० प्रतिशत बढी आम्दानी गरेको छ। आर्थिक वर्ष २०७४/७५ मा एक अर्ब ३० करोड २१ लाख ७८ हजार आम्दानी अनुमान गरिएकामा एक अर्ब ४२ करोड ९५ लाख ९४ हजार आम्दानी भएको उपमहानरपालिकाले जनाएको छ ।
चालु आवका लागि उपमहानरपालिकाले एक अर्ब ६३ करोड रुपैयाँ विनियोजन गरेको छ। हेटौंडाको साविकको वडामा थपिएका अन्य वडाको समान विकास अहिले चुनौतीको विषय रहेको नगर प्रमुख महतले बताए। ‘साविकको ११ भन्दा बाहिर रहेका अन्य आठ वटा वडाको समान विकासमा हामी केन्द्रित छौं’, उनले भने।
गत आवमा भौक्तिक योजनातर्फ ६ सय ५२ योजना सुरु गरिएकामा गत असार अन्तिमसम्म चार सय ६८ मात्र सम्पन्न भएको उपमहानगरपालिकाका सूचना अधिकारी डा.शंकर उपाध्यायले बताए। यस अवधिमा सबैभन्दा बढी दुई सय ८४ वटा स्थानीय सडक, पुल तथा झोलुंगेपुल निर्माण सुरु गरिएकोमा आर्थिक वर्षको अन्तिमसम्म दुई सय २२ वटा सम्पन्न भएको उनले जानकारी दिए ।
एक हजार बर्ग फिटसम्मको नक्सा निःशुल्क अन्य स्थानीय तहले चर्को राजस्व लिएको भन्दै आलोचना भइरहेका बेला हेटौंडा उपमहानगरपालिकाले भने एक हजार वर्ग फिटसम्मको भवन नक्सा निःशुल्क बनाइ दिन थालेको छ।
चालु आर्थिक वर्षको दुई महिनाको बीचमा करिब चार सय नक्सा बनाउन नगरबासीले निवेदन दिएको नगर प्रमुख महतले बताए। साथै यस अवधिमा हेटौंडाको सुमो काउन्ट व्यवस्थित गरी एकीकृत काउन्टर सञ्चाल र बजारको मुख्य राजमार्गमा ट्राफिक व्यवस्थापनको काम गरिएको उनले जानकारी दिए ।
प्रतिक्रिया दिनुहोस !
