बिर्तामोड : तीनवटा ट्रक चोरी गरेको आरोपमा इलाका प्रहरी कार्यालय बिर्तामोडले एक व्यक्तिलाई पक्राउ गरेको छ । पक्राउ पर्नेमा पाँचथरकोे फिदिम नगरपालिका–३ का १९ वर्षीय रोशन श्रेष्ठ रहेका छन् ।
कवाडी पसल तथा ग्यारेजमा बिक्री गरी आर्थिक लाभ लिने उद्देश्यले श्रेष्ठले ट्रक चोरी गरेको प्रहरीको भनाइ छ । चोरी भएका तीनवटै ट्रकहरु फेला पारिएको इलाका प्रहरी कार्यालय बिर्तामोडका प्रमुख कृष्ण कोइरालाले बताए छ ।
गत भदौ ३० गते राति बिर्तामोड नगरपालिका-५ स्थित हर्कलाल मार्गमा पार्किङ गरी राखेको सुजन श्रेष्ठको ना. ५ ख ४९८६ नम्बरको फुलबडी ट्रक चोरी भएको थियो ।
त्यसलगत्तै असोज २ गते राति बिर्तामोड नगरपालिका-५ स्थित एङ्गी बोइ होटल छेउमा पार्किङ गरेको दिलकुमार श्रेष्ठको ना.२ ख ५०८१ नम्बरको फुलबडी ट्रक पनि चोरी भएको उजुरी प्रहरीमा परेको थियो ।
दुई ट्रक चोरीको घटना सेलाउन नपाउँदै असोज ९ गते राति बिर्तामोड नगरपालिका–५ स्थित सुगम पेट्रोल पम्प नजिक पार्किङ गरेको मे १ ख २६३८ नम्बरको जेनिस भट्टराईको ट्रकसमेत चोरी भयो ।
चोरी भएका ट्रकमध्ये ना. ५ ख ४९८६ नम्बरको ट्रक बिर्तामोडबाट नै प्रहरीले नियन्त्रणमा लिएको थियो । ना.२ ख ५०८१ नम्बरको ट्रक सुनसरीको इटहरी र मे. १ ख २६३८ नम्बरको ट्रक पर्साको वीरगन्जबाट बरामद भएको प्रहरीले जनाएको छ ।
ट्रक चोरी गर्नेको खोजी गर्ने क्रममा रोशन श्रेष्ठले चोरेको स्पष्ट भएपछि पक्राउ गरिएको प्रहरी प्रमुख कोइरालाले बताए । श्रेष्ठलाई प्रहरीले असोज १४ गते बेलुका बिर्तामोड नगरपालिका–५ मा लुकीछिपी बसेको सुराक पाएपछि पक्राउ गरेको हो ।
पसलमा चोर्न खोज्ने समातिए
यसैबीच घर र पसलमा चोरीको प्रयास गर्ने अन्य दुईजनालाई पनि बिर्तामोड प्रहरीले पक्राउ गरेको छ । चाडपर्वका लागि विशेष सुरक्षा योजना बनाई परिचालित गस्ती टोलीले उनीहरुलाई पक्राउ गरेको हो ।
गस्तीका क्रममा असोज १४ गते राति साढे १२ बजे बिर्तामोड नगरपालिका–५ स्थित पूर्व– पश्चिम राजमार्ग आसपासका विभिन्न घर, दोकान र घुम्ती पसल चोरी गर्ने उद्धेश्यले पसेको अवस्थामा गौरीगञ्ज–५ का १९ वर्षीय ओमप्रकाश यादव र बिर्तामोड–५ का सुरज राजबंशीलाई पक्राउ गरिएको कोइरालाले बताए ।
उनीहरुलाई मुलुकी फौजदारी अपराधसंहिता ऐन २०७४ को परिच्छेद ५ अन्तर्गत सार्वजनिक हित, स्वास्थ्य, सुरक्षा, सुविधा र नैतिकताविरुद्धको कसुर दफा १ सय १८ बमोजिम थप अनुसन्धान भइरहेको उनले जानकारी दिए । पक्राउ परेका सबैलाई प्रहरीले पत्रकार सम्मेलन गरेर बुधबार सार्वजनिक गरेको छ ।
प्रतिक्रिया दिनुहोस !
